بۇل تۋرالى وبلىستىق ماسليحات سەسسياسىندا دانيال احمەتوۆ مالىمدەدى.   شىعىس قازاقستاندا دەنساۋلىق ساقتاۋ سالاسىن دامىتۋعا باعىتتالعان ءۇش جىلدىق كەشەندى جوسپارعا سايكەس، وڭىردەگى مەديسينالىق مەكەمەلەر زاماناۋي قۇرال-جابدىقتارمەن قامتاماسىز ەتىلەدى.



الداعى تاڭدا مەجەگە الىنعان جوسپارلاردىڭ ءبىرى – قازاقستانداعى تۇڭعىش روبوت تەحنيكاسى ورتالىعىن اشۋ.

– دارىگەرلەر ءۇشىن جاڭا مۇمكىندىكتەرگە باستايتىن جوبا. ولاردىڭ جوعارى بىلىكتىلىگى ءىس جۇزىندە تاجىريبەدە قولدانىلعانى قاجەت. وبلىستا سونىمەن قاتار، ترانسپلانتولوگيا ورتالىعىن دا اشۋ قاجەت، – دەپ اتاپ ءوتتى دانيال احمەتوۆ.

وبلىستا ونكولوگيا، قان اينالىم جۇيەسى اۋرۋلارى، انا مەن بالانى قورعاۋ، تراۆماتولوگيا سياقتى ماڭىزدى باعىتتار بويىنشا دارىگەرلەردىڭ بىلىكتىلىگىن ارتتىرۋعا باعىتتالعان باعدارلاما دا جەمىستى ناتيجەسىن بەرۋدە. 150 مامان اعىلشىن ءتىلىن مەڭگەرىپ، ولاردىڭ دەنى شەتەلدىك جەتەكشى وقۋ ورىندارىندا ماشىقتانۋدان ءوتىپ جاتىر. دانيال احمەتوۆ اتاپ وتكەندەي، دەنساۋلىق ساقتاۋ سالاسىنا بولىنەتىن قاراجات كولەمى ۇلعايماسا، قىسقارمايدى. بىرنەشە جىلدا شىعىستا ساپالى، جاڭا باعىتتاعى مەديسينا قالىپتاسادى. جاڭا مەكەمەلەر اشىلادى، ولاردىڭ ىشىندە سەمەيدەگى يادرولىق مەديسينالىق ورتالىق بار.

شقو اكىمىنىڭ باسپا ءسوز قىزمەتى

 

https://dalanews.kz/30258