شىعىس قازاقستان وبلىسىندا وبلىس اكىمى نۇرىمبەت ساقتاعانوۆتىڭ، ق ر اۋىل شارۋاشىلىعى ۆيسە-مينيسترى امانعالي بەرداليننىڭ، «اتامەكەن» ۇلتتىق كاسىپكەرلەر پالاتاسىنىڭ، رەسپۋبليكالىق اگرارييلەر پالاتالارىنىڭ، عىلىمي ۇيىمداردىڭ، سالالىق قۇرىلىمدارعا تيەسىلى قارجى ينستيتۋتتارىنىڭ جانە وڭىرلىك اگروبيزنەس وكىلدەرىنىڭ قاتىسۋىمەن اگروفورۋم ءوتتى، – دەپ حابارلايدى Dalanews.kz شقو اكىمىنىڭ باسپا ءسوز قىزمەتىنە سىلتەمە جاساپ.
ق ر اۋىل شارۋاشىلىعى مينيسترلىگىنىڭ قولداۋىمەن وتكەن جىلى وبلىستا كوكتەمگى ەگىس جۇمىستارىن قارجىلاندىرۋ كولەمى ايتارلىقتاي ۇلعايىپ، اۋىل شارۋاشىلىعى تاۋارىن وندىرۋشىلەرگە 12 ملرد تەڭگەدەن استام قاراجات نەسيەگە بەرىلدى. نەسيە تەك «اگرارلىق نەسيە كورپوراسياسى» فيليالى مەن بانكتەر ارقىلى عانا ەمەس، العاش رەت «ەرتىس» اكك» اق ارقىلى دا ۇسىنىلدى.
– شىعىس قازاقستان كوبىنە ونەركاسىپتىك ءوڭىر رەتىندە قابىلدانادى، دەگەنمەن اۋىل شارۋاشىلىعىنىڭ وبلىس ەكونوميكاسىنا قوسار ۇلەسى ايتارلىقتاي. اگروونەركاسىپ كەشەنى – ەكونوميكامىزداعى ماڭىزدىلىعى جاعىنان ەكىنشى سالا. بۇگىندە بۇل سالا تۇراقتى دامىپ، ەلىمىزدىڭ اۋىل شارۋاشىلىعى ءونىمىنىڭ 5،6%-ىن قۇراپ وتىر. ءوڭىر وسىمدىك مايىن ءوندىرۋ بويىنشا رەسپۋبليكادا ءبىرىنشى ورىندا. سونىمەن قاتار، بال، قىمىز جانە شۇجىق ونىمدەرىن وندىرۋدە ءداستۇرلى كوشباسشى. سونداي-اق، قۇس ەتى، بالقىتىلعان ىرىمشىك پەن مايلى سۇزبە وندىرىسىندە الدىڭعى قاتاردا. بالىق، قاراقۇمىق جارماسى مەن كونسەرۆى ءوندىرىسى بويىنشا وبلىس تۇراقتى تۇردە رەسپۋبليكاداعى ءۇش ۇزدىك ءوڭىردىڭ قاتارىنا كىرەدى.
وسىمدىك شارۋاشىلىعىنداعى جەتىستىكتەر ەرەكشە اتاپ وتۋگە تۇرارلىق. وتكەن جىلدىڭ قورىتىندىسى بويىنشا وبلىس ارپا (گەكتارىنا 23،8 سەنتنەر) جانە بيداي (گەكتارىنا 23 سەنتنەر) ونىمدىلىگى بويىنشا رەسپۋبليكادا 1-ورىن، راپس بويىنشا – 2-ورىن (24 س/گا)، مايلى داقىلدار بويىنشا – 3-ورىنعا (19،1 س/گا) يە بولدى، – دەدى وبلىس اكىمى نۇرىمبەت ساقتاعانوۆ.
اكىمنىڭ ايتۋىنشا، بۇل فورۋم شىعىس قازاقستان اگروونەركاسىپتىك كەشەنىنىڭ ودان ءارى دامۋىنا جاڭا سەرپىن بەرۋى ءتيىس.
شىعىس قازاقستان وبلىسىنىڭ تاماق جانە قايتا وڭدەۋ ونەركاسىبى اۋىل شارۋاشىلىعىنىڭ نەگىزگى باعىتتارىن تولىقتاي قامتىپ، ءوڭىر مەن ەلدىڭ ازىق-تۇلىك قاۋىپسىزدىگىن قامتاماسىز ەتۋگە باعىتتالعان.
ازىق-تۇلىك قاۋىپسىزدىگىن قامتاماسىز ەتۋدەگى ماڭىزدى مىندەتتەردىڭ ءبىرى – شيكى ءسۇت ءوندىرىسىن ارتتىرۋ. 2024 جىلى وبلىستا 239 مىڭ توننا ءسۇت ءوندىرىلدى، بۇل 2023 جىلمەن سالىستىرعاندا 6%-عا ارتتى. جىل سايىن سيىرلاردىڭ ونىمدىلىگى بويىنشا ەلىمىزدەگى ۇزدىك وندىققا شقو-داعى ءسۇت فەرمالارى كىرەدى.
فورۋمنىڭ پلەنارلىق وتىرىسىندا اوك وكىلدەرى اۋىل شارۋاشىلىعى مەن اگروبيزنەس سالالارىنداعى ءارتۇرلى باعىتتاردىڭ دامۋى تۋرالى باياندادى. ماسەلەن، «ءشىعىس-سۇت» كورپوراسياسىنىڭ باس ديرەكتورى سەيلجان سايلاۋبايەۆ ىرىمشىك وندىرۋشىلەرىنىڭ جەتىستىكتەرى تۋرالى ايتتى. 2024 جىلى «ءشىعىس-سۇت» كورپوراسياسى بەدەلدى حالىقارالىق ىرىمشىك ءوندىرۋشى گيلدياسىنىڭ قۇرمەتتى مۇشەسى مارتەبەسىن الدى. كومپانيا «كاچكاۆال» تۇزدى ىرىمشىگىمەن «ونەركاسىپتىك وندىرىستەگى ىرىمشىكتەر» ساناتىندا التىن مەدال يەلەنىپ، قازاقستان، رەسەي، فرانسيا، نيدەرلاندى جانە باسقا ەلدەردەن كەلگەن قاتىسۋشىلاردى باسىپ وزدى. سونداي-اق، كورپوراسيا «مااسدام» ىرىمشىگى ءۇشىن كۇمىس، ال «پارمەزان» جانە «گوللاند» ىرىمشىكتەرى ءۇشىن قولا مەدال جەڭىپ الىپ، ونىمدەرىنىڭ جوعارى ساپاسىن كورسەتتى.
قازاقستانداعى مايلى داقىلداردى وڭدەۋشىلەر ۇلتتىق قاۋىمداستىعىنىڭ ءتوراعاسى يادىكار يبراگيموۆ بۇل سالاداعى جەتىستىكتەر تۋرالى باياندادى.
ايتا كەتەيىك، ماي ءوندىرۋ بويىنشا كوشباسشى ءوڭىر — شقو اۋماعىندا 12 ماي وڭدەۋ زاۋىتى جۇمىس ىستەيدى، ولار تاۋلىگىنە 2000 توننادان استام مايلى داقىلداردى وڭدەۋگە قاۋقارلى. زاۋىتتاردىڭ جۇكتەمەسى 86%-دان اسادى. وڭىردەگى كاسىپورىندار جاڭعىرتىلىپ، تەرەڭ وڭدەۋگە كوشىپ جاتىر. مىسالى، «التىن شىعىس» ماي زاۋىتى – كۇنباعىس ءدانىنىڭ تەرەڭ وڭدەلۋىنىڭ ءونىمى بولىپ تابىلاتىن بيولوگيالىق قوسپا – سۇيىق لەسيتين وندىرەدى.
تەحنولوگيالاردىڭ دامۋىنا بايلانىستى ۇشقىشسىز ۇشۋ اپپاراتتارى اۋىل شارۋاشىلىعىندا بارعان سايىن ماڭىزدى قۇرالعا اينالۋدا. بۇگىندە اگرودرونداردى قولدانۋ اگرارييلەردىڭ جۇمىسىن ءتيىمدى ەتىپ قانا قويماي، اۋىل شارۋاشىلىعى ءوندىرىسىنىڭ تۇراقتى دامۋىنا ىقپال ەتۋدە. «Greentech Digital» ج ش س وكىلى نيكيتا دميتريەنكو اگرودرونداردى پايدالانۋدىڭ ارتىقشىلىقتارى مەن تيىمدىلىگى تۋرالى ايتتى.
وتكەن جىلى شىعىس قازاقستاننىڭ اگرارييلەرى تىڭايتقىشتاردى قولدانۋ كولەمىن 47 مىڭ تونناعا دەيىن ارتتىردى. بيىل بۇل كورسەتكىش 60 مىڭ توننادان اسادى دەپ جوسپارلانۋدا. سونىمەن قاتار، ارامشوپتەر مەن زيانكەستەرگە قارسى كۇرەس جۇرگىزىلەدى، وعان وتاندىق وندىرىستەگى پەستيسيدتەر دە پايدالانىلادى. «استانا نان» ج ش س باس ديرەكتورى ىرىسبەك يسايەۆ بۇل باعىتتاعى جاڭاشىلدىقتار تۋرالى باياندادى.
فورۋم قورىتىندىسىندا وبلىس اكىمى مۇنداي كەزدەسۋلەردى جىلىنا ەكى رەت – كوكتەمدە، كوكتەمگى دالا جۇمىستارى باستالعانعا دەيىن جانە كۇزدە، اۋىل شارۋاشىلىعى قىزمەتكەرلەرى كۇنىنە وراي وتكىزۋ تۋرالى ۇسىنىس جاسادى.
فورۋم اياسىندا اۋىل شارۋاشىلىعى تەحنيكاسى مەن جابدىقتارىنىڭ كورمەسى ءوتتى.
