شەرزات پولاتتىڭ اكەسى قارجاۋباي نۇرىموۆتىڭ ادۆوكاتى مەيىرمان شەكەيەۆ ءوز كولىگىنە قاتىستى كۇماندى جاعداي بويىنشا قىلمىستىق ءىس قوزعالعانىن حابارلادى. ايتۋىنشا، بۇل — قوسىمشا قىلمىستىق ءىس، دەپ حابارلايدى Dalanews.kz.
بۇل تۋرالى ادۆوكات الەۋمەتتىك جەلىدەگى پاراقشاسىندا جاريا ەتتى.
داۋلى وقيعا 29 ءساۋىر كۇنى تىركەلگەن. سول كۇنى ادۆوكات ءوزىنىڭ كولىگىنە وتىرىپ، دوڭگەلەكتەرىنىڭ ەكى بولتى جوق ەكەنىن بايقايدى. جاعدايدى ول سوت وتىرىسىنان شىققان سوڭ الەۋمەتتىك جەلى ارقىلى جۇرتقا جەتكىزگەن ەدى.
ادۆوكاتتىڭ ايتۋىنشا، بۇل وقيعا جاي عانا تەحنيكالىق اقاۋ ەمەس، ادەيى جاسالعان ارەكەت بولۋى مۇمكىن. بۇگىن ول تالدىقورعان قالاسىنداعى جەتىسۋ وبلىستىق پوليسيا باسقارماسىندا اتالعان دەرەككە بايلانىستى قىلمىستىق ءىس قوزعالعانىن مالىمدەدى.
– ەستەرىڭىزدە بولسا، كولىگىمنىڭ دوڭگەلەكتەرىنەن بۇراندا شەشىلگەنى تۋرالى ارىزدانعان ەدىك. بۇگىن سوعان قاتىستى جانە مەنىڭ موبيلوگرافىمدى قورقىتۋ ارەكەتىنە بايلانىستى قىلمىستىق ءىس تىركەلدى. ەندى ەشكىم جازاسىز قالمايدى دەپ سەنەمىز، – دەدى شەكەيەۆ.
بۇل مالىمدەمە قوعامدا رەزونانس تۋدىرعان شەرزات پولات ءىسىنىڭ اينالاسىندا قاۋىپسىزدىككە قاتىستى جاڭا كۇدىكتەردى تۋدىرىپ وتىر.
