قوستاناي وبلىسىندا مەملەكەتتىك قىزمەتشىلەرگە ءىسساپار شىعىندارىن وتەۋ كەزىندە جۇيەلى بۇزۋشىلىقتار انىقتالدى، دەپ حابارلايدى Dala News.

بۇل تۋرالى مەملەكەتتىك قىزمەت ىستەرى دەپارتامەنتى ءمالىم ەتتى. تەكسەرۋ ناتيجەسىندە ءىسساپار تولەمدەرى ءجيى دۇرىس ەسەپتەلمەيتىنى بەلگىلى بولعان.

جالپى 20 دەرەك تىركەلگەن. ونىڭ 12-سىندە ارتىق تولەم جاسالىپ، شامامەن 319 مىڭ تەڭگە نەگىزسىز تولەنگەن. ال 8 جاعدايدا كەرىسىنشە، قىزمەتكەرلەرگە 472 مىڭ تەڭگەگە جۋىق قاراجات تولىق تولەنبەگەن.

باستى ماسەلە – تولەمدەردىڭ كەشىكتىرىلۋى. ماماندار 400-گە جۋىق جاعدايدا ءىسساپار شىعىندارى ۋاقىتىندا وتەلمەگەنىن انىقتاعان. قاراجات ءۇش كۇننەن ءبىر ايعا دەيىن كەشىكتىرىلگەن.

وسى ۋاقىت ارالىعىندا مەملەكەتتىك قىزمەتشىلەر جول اقىسى، تۇرۋ جانە تاماقتانۋ شىعىندارىن ءوز قالتاسىنان تولەۋگە ءماجبۇر بولعان.

دەپارتامەنت وكىلدەرىنىڭ ايتۋىنشا، ءىسساپار – قىزمەتتىك تاپسىرما بولىپ سانالادى، سوندىقتان وعان بايلانىستى بارلىق شىعىندار تولىق ءارى ۋاقىتىندا وتەلۋى ءتيىس. بۇل تالاپتار «مەملەكەتتىك قىزمەت تۋرالى» زاڭدا جانە ۇكىمەت بەكىتكەن قاعيدالاردا كورسەتىلگەن.

ۆەدومستۆونىڭ ارالاسۋىنان كەيىن قايتا ەسەپ جۇرگىزىلىپ، جەتىسپەگەن قاراجات تولىق تولەنگەن. انىقتالعان زاڭبۇزۋشىلىقتار جويىلعان.

دەپارتامەنت مەملەكەتتىك قىزمەتشىلەردىڭ قۇقىقتارىن قورعاۋ باعىتىنداعى جۇمىستى جالعاستىراتىنىن مالىمدەدى.