اۋدان مەن اۋىل اكىمدەرىنىڭ «ىڭعايلى كرەسلولارعا» بيۋدجەتتەن قانشا قارجى جۇمساپ جۇرگەنى جانە قانشا جۇمساۋعا دايىن ەكەنى انىقتالدى، دەپ حابارلايدى Dalanews.kz Tengrinews.kz-كە سىلتەمە جاساپ.
تۇركىستان وبلىسى: باسشىلىق كرەسلوسىنا 194 مىڭ تەڭگە
22 شىلدەدە تۇركىستان وبلىسى سايرام اۋدانى اكىمىنىڭ اپپاراتى «باسشى كرەسلوسىن» ساتىپ الۋعا تەندەر جاريالادى. بۇل ماقساتقا بيۋدجەتتەن 194 مىڭ تەڭگە بولىنگەن.
تەحنيكالىق سيپاتتامادا كرەسلونىڭ مەتالل، اعاش جانە تابيعي بىلعارىدان جاسالۋى ءتيىس ەكەنى كورسەتىلگەن. قولدى تىرەيتىن ورىننىڭ ماتەريالى - «جاڭعاق اعاشى/تابيعي بىلعارى» بولۋى كەرەك.
ءتورت قاتىسۋشى ب ا ق سىناعان كونكۋرس 24 شىلدەدە اياقتالىپ، كرەسلونى 155 مىڭ تەڭگەگە ۇسىنعان جەكە كاسىپكەر جەڭىمپاز دەپ تانىلدى.
اتىراۋ وبلىسى: اۋىل اكىمى 250 مىڭ تەڭگەلىك كرەسلوعا تاپسىرىس بەرگەن
21 شىلدەدە اتىراۋ وبلىسى قىزىلقوعا اۋدانى جامبىل اۋىلدىق وكرۋگى اكىمىنىڭ اپپاراتى دا «باسشى كرەسلوسىن» ساتىپ الۋعا كونكۋرس جاريالادى. ۇيىمداستىرۋشى - وكرۋگ اكىمى وسپان ارونوۆ. جوسپارلانعان سوما - 250 مىڭ تەڭگە.
تەحنيكالىق سيپاتتاما بويىنشا اكىمدىك «كلاسسيكالىق ۇلگىدەگى جوعارى ساپالى، ءساندى كرەسلونى» الۋدى كوزدەگەن. ماتەريالى تابيعي بىلعارى، قاڭقاسى مەتالل مەن اعاش. اعاشتان جاسالعان قولتىرەكتەر ەكوكوجامەن قاپتالۋى مۇمكىن.
كونكۋرس ەكى كۇنگە سوزىلىپ، 23 شىلدەدە اياقتالعان. سەگىز ۇمىتكەر قاتىسقان بايقاۋدا جەڭىمپاز كرەسلونى 148 مىڭ تەڭگەگە ۇسىنعان كاسىپكەر بولدى.
كۋرچاتوۆ قالاسى: باسشى كرەسلوسىنا 150 مىڭ تەڭگە
11 شىلدەدە كۋرچاتوۆ قالاسىنىڭ ەكونوميكا جانە قارجى ءبولىمى دە «باسشى كرەسلوسىن» ساتىپ الۋعا كونكۋرس جاريالادى. بولىنگەن سوما - 150 مىڭ تەڭگە.
تەحنيكالىق سيپاتتامادا بۇل كرەسلو «باسشىنىڭ جۇمىس ورنىن جابدىقتاۋعا ارنالعان» جانە «ۇزاق ۋاقىت بويى جۇمىس ىستەگەندە جايلىلىقتى قامتاماسىز ەتۋى كەرەك» دەلىنگەن. بۇل جولى تابيعي بىلعارىدان باس تارتىلىپ، «پرەميۋم ساناتتاعى جاساندى بىلعارى» تاڭدالعان.
ءبىرىنشى تەندەرگە قاتىسۋشىلار بولماعان سوڭ، ساتىپ الۋ «ءساتسىز وتكەن ساتىپ الۋ بويىنشا ءبىر كوزدەن» تاسىلىمەن ءوتتى. بۇل جولى قاتىسۋشى رەتىندە مۇگەدەكتەر ۇيىمى سانالاتىن «وسكەمەندىك ۋپپ» مەكەمەسى تاڭدالعان.
سونىمەن قاتار، اكىمدىك كرەسلودان بولەك، جالپى سوما 1 113 928 تەڭگەگە تەڭ بولاتىن جيھاز جيىنتىعىن ساتىپ الۋدى جوسپارلاعان: ۇستەل، ۇستەلگە قوسىمشا قۇرىلىمدار، شكاف جانە ەكى كەڭسە كرەسلوسى. سوڭعى كەلىسىمشارت سوماسى 1 110 000 تەڭگەنى قۇرادى.
قۇرمانعازى مەن جارمىش: كرەسلو بار، جەتكىزۋشى جوق
25 شىلدەدە اتىراۋ وبلىسى قۇرمانعازى اۋدانى اكىمىنىڭ اپپاراتى رەسيكلدەلگەن (ۇساقتالعان بىلعارى نەگىزىندە جاسالعان) ماتەريالدان جاسالعان التى كرەسلو ساتىپ الۋدى جوسپارلادى. بولىنگەن قاراجات - 803 مىڭ تەڭگە (ءبىر كرەسلوعا 133 مىڭ تەڭگە).
الايدا 29 شىلدەگە دەيىن بىردە-بىر جەتكىزۋشى ءوتىنىم بەرمەگەن. ەندى ساتىپ الۋ «ءبىر كوزدەن» تاسىلىمەن ءوتۋى مۇمكىن.
ۇقساس جاعداي ماڭعىستاۋ وبلىسى جارمىش اۋىلىندا دا تىركەلدى. مۇندا 25 شىلدەدە ءبىر كرەسلوعا 250 مىڭ تەڭگە بولىنگەن، الايدا 29 شىلدەگە دەيىن جەتكىزۋشى تابىلماعان. تيىسىنشە، بۇل جەردەگى تەندەر دە قايتا جاريالانۋى مۇمكىن.
اكىمدىكتەر باسشىلارعا كرەسلونى ارزانعا الا الا ما؟ ءيا، مىسالى، قىزىلقوعا اۋدانى تايسويعان اۋىلدىق وكرۋگىنىڭ اكىمدىگى 1 شىلدەدە كرەسلو ساتىپ الۋعا 42 مىڭ تەڭگە ءبولىپ، تەحنيكالىق سيپاتتاماسىن قىسقا ءارى ناقتى بەرگەن: «كومپيۋتەرلىك كرەسلو، جيھاز، قارا ءتۇستى». كرەسلونى 36 مىڭ تەڭگەگە ۇسىنعان جەكە كاسىپكەر جەڭىمپاز بولدى.
10 شىلدەدە جامبىل وبلىسى مويىنقۇم اۋدانى بەرلىك اۋىلدىق وكرۋگىنىڭ اكىمدىگى كرەسلوعا 85 مىڭ تەڭگە ءبولدى. ماتەريال ەكوبىلعارى، قولتىرەكتەرى جۇمساق توسەمدى پلاستيك. ساتىپ الۋ «ءبىر كوزدەن» تاسىلىمەن ءوتىپ، «سارا» جك باستاپقى باعادا جەتكىزىپ بەرگەن.
