ولجاس بەكتەنوۆ پرەزيدەنت تاپسىرمالارىن جۇزەگە اسىرۋ جونىندەگى سيفرلىق شتاب وتىرىسىن وتكىزدى، دەپ حابارلايدى Dalanews.kz.
قازاقستان رەسپۋبليكاسىنىڭ پرەمەر-مينيسترى ولجاس بەكتەنوۆ مەملەكەت باسشىسىنىڭ جاساندى ينتەللەكتىنى دامىتۋ ماسەلەلەرى جونىندەگى كەڭەستە بەرگەن تاپسىرمالارىن جۇزەگە اسىرۋ بويىنشا سيفرلىق شتاب وتىرىسىن وتكىزدى.
كۇن تارتىبىندە ءتورت ماسەلە قارالدى. جيىندا قازاقستان رەسپۋبليكاسىنىڭ سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى جاسلان مادييەۆ بايانداما جاسادى.
سيفرلىق شتابتىڭ شەشىمىمەن:
- مەملەكەتتىك ورگانداردىڭ اقپاراتتىق جۇيەلەرىن ينتەگراسيالاۋدىڭ كەشەندى جوسپارى بەكىتىلدى؛
- جاساندى ينتەللەكت دەرەكتەر ماسسيۆتەرىمەن جۇمىس ىستەۋ رەگلامەنتى جانە ونى جۇزەگە اسىرۋ جوسپارى بەكىتىلدى؛
- Smart Data Ukimet بويىنشا مەملەكەتتىك دەرەكتەردى بىرىكتىرۋ بويىنشا جۇمىستاردى اياقتاۋ مەرزىمدەرى انىقتالدى. جاڭا حەشتەۋ ءادىسىن قولداناتىن ينتەگراسيا بيىلعى 1 قىركۇيەگىندە اياقتالۋى كەرەك، ال بارلىق دەرەكتەر وسى جىلدىڭ 1 جەلتوقسانىنا دەيىن پلاتفورماعا بەرىلۋى كەرەك؛
- وسى جىلدىڭ 15 قىركۇيەگىنە دەيىن مەملەكەتتىك ورگاندار قىزمەتكەرلەرىنىڭ AITU ۇلتتىق مەسسەندجەرىنە كوشۋى.
پرەمەر-مينيستر قابىلدانعان قۇجاتتاردى ساپالى ءارى ۋاقتىلى ىسكە اسىرۋدىڭ ماڭىزدىلىعىن اتاپ ءوتتى.
"مەملەكەت باسشىسى قازاقستان ەۋرازياداعى سيفرلىق حابقا اينالۋى ءتيىس دەگەن ماقساتتى العا قويىپ وتىر. ناقتى مىندەتتەر بەلگىلەندى. بۇگىنگى تاڭدا سيفرلىق شتاب بارلىق مەملەكەتتىك ورگان مەن ۇيىمدار ءۇشىن مىندەتتى شەشىمدەر قابىلدادى. ناتيجە اقپاراتتىق قاۋىپسىزدىكتى جاقسارتۋعا جانە مەملەكەتتىك اپپاراتتىڭ تيىمدىلىگىن ارتتىرۋعا باعىتتالعان"، - دەدى ولجاس بەكتەنوۆ.
جيىندا AITU ۇلتتىق مەسسەندجەرىن كەڭ اۋقىمدا ەنگىزۋ ماسەلەسى قارالدى. ونىڭ پيلوتتىق جۇمىسى سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىندە كورسەتىلدى، ەندى اتالعان قىزمەت مەملەكەتتىك ورگاندار مەن كۆازيمەملەكەتتىك سەكتور ۇيىمدارىنىڭ بارلىعىنا ەنگىزىلەدى.
