اقمولا وبلىسىندا 300 ملن تەڭگەدەن استام قاراجاتتى جىمقىرعانى ءۇشىن اتباسار اۋدانىنىڭ اكىمدىگىنە قاراستى قۇرىلىس ءبولىمى، «پرەستيج ستروي 7» جانە «فۋندامەنتال» ءجشس-نىڭ باسشىلارىنا قاتىستى سوتقا دەيىنگى تەرگەپ-تەكسەرۋ اياقتالدى، دەپ حابارلايدى Dalanews.kz.
اقپاراتقا سايەس، اتالعان قاراجات 2021 جىلى ۇكىمەت رەزەرۆىنەن اتباسار اۋدانىندا سۋ تاسقىنى ايماعىندا تۇراتىن 200 جانۇيانى كوشىرۋ ءۇشىن ەكى 100 پاتەرلى ءۇيدى سالۋعابولىنگەن.
"كۇدىكتىلەردىڭ ارەكەتى اسا ءىرى كولەمدە جىمقىرۋ – تالان-تاراجعا سالۋ (ق ر قك 189 بابى 4 بولىگى) بويىنشا سارالاندى. كورسەتىلگەن باپ بويىنشا مۇلكىن تاركىلەۋمەن قوسا 12 جىلعا دەيىن باس بوستاندىعىنان ايىرۋ جازاسى كوزدەلگەن"، – دەلىنگەن پروكۋراتۋرا حابارلاماسىندا.
ەكى كۇدىكتى سوت سانكسياسىمەن كۇزەتپەن ۇستاۋعا، ال ءۇشىنشى ادام ءۇيقاماققا الىندى.
"تەرگەۋ بارىسىندا قىلمىستىق جولمەن الىنعان مۇلىك – الماتى، استانا قالالارىندا كوممەرسيالىق جىلجىمايتىن مۇلىك، ارنايى تەحنيكا، قۇرىلىس قۇرىلعىلار جانە بانكتىق شوتتاردا 50 ملن تەڭگەدەن استام قاراجات تابىلدى. بۇعاتتالعان مۇلىكتىڭ باعالانعان قۇندىلىعى 335 ملن تەڭگەدەن استى. اتالعان مۇلىكتىڭ ءبىر بولىگى جالعا بەرىلىپ، قىلمىستىق پايدا تۇسىرىلگەنى انىقتالدى"، – دەلىنگەن حابارلامادا.
سول سەبەپتى، ءبىر كۇدىكتىنىڭ ارەكەتى قىلمىستىق جولمەن الىنعان اقشانى جانە وزگە مۇلىكتى زاڭداستىرۋ (جىلىستاتۋ)، ياعني ق ر قك 218 بابى 3 بولىگى بويىنشا قوسىمشا سارالاندى. بۇل ءۇشىن مۇلكىن تاركىلەۋمەن قوسا 10 جىلعا دەيىن باس بوستاندىعىنان ايىرۋ جازاسى كوزدەلگەن.
ءقازىر كۇدىكتىلەر قىلمىستىق ءىس ماتەريالدارىمەن تانىسىپ جاتىر.
