بۇگىن تۇركىستاندا مۇمكىندىگى شەكتەۋلى جاستارعا ارنالعان «شەكسىز مۇمكىندىك» وبلىستىق ونەر فەستيۆالى ءوتتى. ءىس-شاراعا وبلىستىق مادەنيەت باسقارماسى باسشىسىنىڭ ورىنباسارى ەرجان يساتايەۆ اشىپ بەرىپ، قاتىسۋشىلارعا ساتتىلىك تىلەدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
– بۇگىن كەرەمەت ءىس-شارانىڭ كۋاسى بولىپ وتىرمىز. قوعامدا ەرەكشە جاندارعا اركەز قۇرمەت جوعارى. جاقسىلىق جاساۋ – يماندىلىقتىڭ، تاربيەلىلىكتىڭ، پاراساتتىلىقتىڭ ايقىن كورىنىسى. ەرتەڭگە تالپىنىس، بولاشاققا باعدار، يگى ىسكە ۇمتىلىس – ادامزاتقا ءتان قۇبىلىس. اركەز جۇرەگىمىز كەڭ، پەيىلىمىز اق بولىپ جاقسىلىق جاساۋعا ۇمتىلىپ تۇرايىق! ونەرلى ازاماتتارعا شىعارماشىلىق تابىس تىلەيمىن! – دەدى باسقارما باسشىسىنىڭ ورىنباسارى.
اتالعان شاراعا ارىسى استانا مەن شىمكەنت قالاسىنان، بەرىسى قىزىلوردا وبلىسى مەن تۇركىستان ءوڭىرىنىڭ اۋدان، قالالارىنان قاتىستى.
تالانتتار جينالعان بايقاۋعا باس اياعى 50-گە جۋىق ونەرپاز بوي كورسەتتى. پاتريوتتىق جانە مەرەكەلىك اندەردى شىرقاپ، بويداعى ونەرىن پاش ەتكەن دارىن يەلەرىنە سىي-سياپات تابىستالدى.
شارا بارىسىندا قىلقالام جانە قولونەرشىلەردىڭ كورمە-جارمەڭكەسى دە كوپشىلىك نازارىنا ۇسىنىلدى. سونداي-اق، «تۇركىستان» برەندىمەن قۇندى سىيلار بەرىلدى. ىنتالاندىرۋ ماقساتىندا بارلىعىنا العىس حاتتار تابىستالدى.
ايتا كەتەيىك، فەستيۆال ماقساتى – ەرەكشە دارىندى جاستار مەن جاسوسپىرىمدەردىڭ شىعارماشىلىعىنا قولداۋ ءبىلدىرىپ، ۇلتتىق رۋحتا تاربيەلەۋ.
