ونەر دوداسىنىڭ ماقساتى – ءان ونەرىن دامىتۋ، جاس تالانت يەلەرىن ىزدەۋ، جاستار اراسىندا سازگەرلىك ونەردىڭ كاسىبي دەڭگەيگە كوتەرىلۋىنە جول اشۋ. جاستاردى وتانسۇيگىشتىككە باۋلۋ، ۇلتتىق رۋحتا تاربيەلەۋ جانە پاتريوتتىق تاقىرىپتا حالىق اراسىنا، ونەر سۇيەر قاۋىمعا كەڭىنەن ناسيحاتتاۋ.
شارانى بايدىبەك اۋدانىنىڭ اكىمى تاناگوزوۆ باقىتبەك تولەن ۇلى قۇتتىقتاۋ سوزبەن اشىپ بەردى.
– ۇلى جازۋشى مۇحتار اۋەزوۆتىڭ ءوزى «شايانعا بارساڭ ءانشىمىن دەمە» دەپ باعا بەرگەن ونەر مەن مادەنيەتتىڭ ورداسى بايدىبەك اۋدانىنان قانشاما انشى-سازگەرلەر قانات قاققانى بارشاعا بەلگىلى. قۇرىلعانىنا 90 جىل تولعان بايدىبەك اۋدانى الەۋمەتتىك، ەكونوميكالىق جاعىمەن عانا ەمەس رۋحانياتى مەن مادەنيەتى ارقىلى دا ءوز ورنىن ەرەكشەلەدى. تارلان تالانتتار مەن دارا دارىن يەلەرىنىڭ دانا جولىن جاڭا بۋىن دا جالعاستىرارىنا سەنىم مول. بارشاڭىزدى، اۋدارۋىمىزدىڭ ايتۋلى جىلىمەن قۇتتىقتايمىن. ەلىمىز امان، جۇرتىمىز تىنىش بولسىن! ءاربىر شاڭىراقتان بەرەكە، قۋانىش ارىلماسىن! – دەدى اۋدان باسشىسى.
ءتورتىنشى رەت ۇيىمداستىرىلعان وبلىستىق ونەر دوداسىنا ق ر ەڭبەك سىڭىرگەن مادەنيەت قايراتكەرى ءسابيرا ءابدىرايىموۆا، ق ر مەملەكەتتىك سىيلىعىنىڭ لاۋرەاتى، وپەرا ءانشىسى تالعات كۇزەنبايەۆ، ق ر مادەنيەت قايراتكەرى ءابدىحان نۇرماعانبەتوۆ، سازگەر-انشى جارىلقاسىن داۋلەتوۆ قازىلىق ەتتى.
بايقاۋعا ءوڭىرىمىزدىڭ اۋدان، قالالارىنان 19 ۇمىتكەر قاتىسىپ، وتان، تۋعان جەر، بەيبىتشىلىك، حالىقتار دوستىعى، ەل بىرلىگى تۋرالى تاۋەلسىزدىك جىلدارى جازىلعان پاتريوتتىق اندەر مەن بايدىبەك اۋدانىنان شىققان سازگەرلەردىڭ شىعارماسىن ورىندادى.
قازىلار القاسىنىڭ شەشىمىمەن باس جۇلدەگە بايدىبەك اۋدانىنان «قوستۇرا» دۋەتى يە بولسا، ءبىرىنشى ورىن شىمكەنت قالاسىنان كەلگەن «سامۇرىق» تريوسىنا بەرىلدى. ەكىنشى ورىنمەن الماتى قالاسىنان كەلگەن «RAYYAN» توبى ماراپاتتالسا، ءۇشىنشى ورىنعا شاردارا قالاسىنان اقمارال ۇسەن قىزى جانە كەنتاۋ قالاسىنان ايجان تۇرسىنبەك قىزى يە بولدى. سونداي-اق، بايدىبەك اۋدانى اكىمىنىڭ ارنايى جۇلدەسىمەن شىمكەنت قالاسىنىڭ ءانشىسى قارلىعاش ايتماحانبەت، «كورەرمەن كوزايىمى» نوميناسياسىمەن وتىرار اۋدانىنان ۇلجالعاس ءابىلداحان، «ەڭ جاس ءانشى» نوميناسياسىمەن بايدىبەكتىك مادي ساتمان ماراپاتتالدى.
بارشا جەڭىمپازدارعا اقشالاي سىيلىقتار جانە اۋدان اكىمىنىڭ العىس حاتى تابىستالدى.
