– 2 شىلدە كۇنى – مۇحتار اعامىزدىڭ تۋعان كۇنى. جىلدا رەداكسيا قىزمەتكەرلەرى اعامىزدىڭ تۋعان كۇنىن اتاپ ءوتىپ، شاي ىشەتىنىمىز بار. بيىل دا سول ءداستۇر بويىنشا داستارحان باسىنا جينالعانبىز. ءبىراق مۇقاڭنىڭ مازاسى بولماي وتىردى. اكىمدىكتەن دە قۇتتىقتاۋ كەلگەن بولاتىن. ولارعا دا كوڭىل اۋانىن بىلدىرە قويماي، جالپى مازاسىز وتىردى. جەڭگەمىز دە ەكى كۇننەن بەرى وسى كۇيدە جۇرگەنىن ايتتى. اۋىرىپ وتىرعانىن بىلدىك. ءبىراق جاي تۇماۋ دەپ ويلاعانبىز، – دەگەن قۇديار ءبىلال سول كۇنى كەشكىسىن جەدەل جاردەم شاقىرىلعانىن ايتادى.
اۋرۋحاناعا جەتكىزىلگەننەن كەيىن دارىگەرلەر مۇحتار شاحانوۆتىڭ وكپەسىنىڭ قابىنعانىن انىقتاعان. ءسويتىپ «قالقامانداعى» اۋرۋحاناعا الىپ كەتتى. بىزدە ىشكە كىرگىزبەدى. حابارلاسىپ تۇردىق. ءبىراق ەمدەۋ پروسەسىنە كوڭىلى تولمايتىنىن اڭعارتىپ، اۋرۋحانادان شىعامىن دەپ مازاسىزدىق بىلدىرە باستادى.
جالپى مۇقاڭ مىنەزدى ادام عوي. تىكە ايتادى. دەسە دە دارىگەرلەرمەن سويلەسىپ، ونىڭ اۋرۋحانادان شىعۋىنا مۇمكىندىك بەرمەدىك. ءبىراق كۇندەر وتە كەلە مۇقاڭنىڭ داۋىسى باسەڭدەپ، ەمدەۋشى دارىگەرلەر ونىڭ تاماق ىشپەيتىنىن ايتتى.
كوڭىلىنە جاقپاعان ءبىر نارسە بولدى ما، جوق باسقا ما – ايتەۋ ەمدەۋ وڭ ناتيجە بەرگەن جوق. «شىعارىڭدار» دەگەندى ايتا بەرەدى. وسى جاعدايعا بايلانىستى مەملەكەتتىك تۇرعىدا قامقورلىققا الۋ تۋرالى پرەزيدەنتكە اشىق حات جازدىم، – دەيدى ول.
قۇديار ءبىلال سول حاتتان پرەزيدەنت قۇلاعدار بولدى دەپ ويلايتىنىن جەتكىزدى. «سودان اعامىز اۋرۋحانادان ءوز بەتىنشە شىعىپ كەتتى. بىزگە ايتىلمايدى عوي. ەكى كۇن ۇيدە ەمدەلگەننەن كەيىن جوعارى دەڭگەيدەگى قامقورلىققا الىنىپ، مۇقاڭدى ينفەكسيالىق اۋرۋحاناعا الىپ كەتتى. سول جاقتا ەم قابىلداي باستادى.
حابارلاسساق ازىلدەپ «كۇنىنە ەلۋ ۋكول سالادى» دەيدى. ەم قالىپتى ءجۇرىپ جاتىر دەپ، كوڭىلى ورنىققان سەكىلدى. سول جەرگە بارعاننان كەيىن بىردەن بەتى بەرى قاراي باستادى.
بارىپ سىرتتاي تىلدەسىپ جۇردىك. قاسىنداعى كىسىلەرمەن دە، دارىگەرلەرمەن دە سويلەسىپ تۇردىق. ءتارتىپ قاتاڭ ەكەن. دارىگەرلەردىڭ كيىم كيىسى، ءتارتىپ، ەمدەۋ شارالارىن ءبارىن سىرتتاي باقىلاپ، ونداعى جۇمىستار مەملەكەتتىك تۇرعىدا جاسالعان ۇلكەن ءىس-شارا ەكەنىن سەزىنەسىڭ. كورەسىڭ. ۇلكەن جۇمىس جاسالىپ جاتقانىن ۇعاسىڭ. ول جەردەگى قامقورلىقتىڭ دا، مۇمكىندىكتىڭ دە جوعارى ەكەنىن بىلدىك، – دەيدى قۇديار ءبىلال.
قۇديار ءبىلال اۋرۋحانادا جاتقان باسقا دا ادامداردىڭ تەرەزە ارقىلى تىلدەسىپ، جاعدايىن سۇراپتى. «ءبارى دە ريزاشىلىعىن ءبىلدىرىپ، قۋانىپ، شىعامىز دەپ جاتتى. بارعاننان كەيىن جۋرناليست بولعاننان كەيىن ءبىلىپ قالايىن دەپ جاتىرمىن عوي باياعى. مۇقاڭ دا سول قامقورلىقتىڭ ارقاسىندا امان-ەسەن ۇيىنە ورالدى. ءقازىر اعامىزعا «جاتا بەرەسىز بە، جۇمىسقا قاشان شىعاسىز» دەپ ازىلدەيمىز. ازىرشە ۇيىندە ەم قابىلداپ جاتىر. دۇيسەنبىدە رەداكسياعا ءبىر كەلىپ كەتەدى»، – دەپ ءتۇيدى قۇديار ءبىلال.
