– ارمرەستلينگ دەگەن سيرەك كەزدەسەتىن سپورت تۇرىنەن شاردارا اۋدانىنىڭ سپورتشىلارى ءىرى دودالاردا ەلىمىزدىڭ اتىن الەمگە پاش ەتىپ ءجۇر. شەكارا تاڭدامايتىن سپورت ارقىلى جەرلەستەرىمىز الەم جۇرتشىلىعىنا تانىمال.
دەنساۋلىقتىڭ نەگىزگى شارتى – مادەني ورتا، سالاۋاتتى ءومىر سالتى. سوندىقتان دا ەلباسى ن.ءا.نازاربايەۆ «قازاقستان-2030» ستراتەگيالىق باعدارلاماسىندا «سالاۋاتتى ءومىر سالتى ءارقايسىمىزدىڭ دەنە تاربيەسىمەن اينالىسۋىمىزعا، دۇرىس تاماقتانۋىمىزعا، تازالىق پەن ساۋىقتىرۋ شارالارىن ساقتاۋىمىزعا باعىتتالعان» دەپ اتاپ كورسەتكەن. جالپى، سپورتپەن شۇعىلدانامىن دەگەن ادام جەر تاڭدامايدى. ناعىز تالانتتى جاستار اۋىلدا، – دەدى وبلىس اكىمى ءومىرزاق شوكەيەۆ.
دزيۋدو زالىندا جەرگىلىكتى ۇل-قىزدار جاتتىعاتىن بولادى. قول كۇرەس سپورتىنان مىقتىلىعىن الەمگە مويىنداتىپ كەلەتىن شاردارالىق جاستار كلۋبتا بوكس، كۇرەس، كاراتە، نايزا، يادرو لاكتىرۋمەن شۇعىلدانادى.
وبلىس باسشىسىنىڭ اتىنان كاسىبي سپورتشىلارعا ارنالعان امەريكالىق سپورت جابدىقتارى سىيعا تارتىلدى.
ايتا كەتەيىك، ارمرەستلينگ سپورت مەكتەبىنەن 2 مىڭعا جۋىق سپورتشى ءتۇرلى دەڭگەيدەگى جۇلدەلەردىڭ يەسى اتانعان. كلۋب جاتتىقتىرۋشىلارى 48 الەم چەمپيونىن، 316 ق ر چەمپيونىن، 144 ازيا چەمپيونىن، 50 ازيا كۋبوگىنىڭ يەگەرلەرىن، 85 حالىقارالىق تۋرنيرلەر جەڭىمپازدارى مەن 62 ق ر حالىقارالىق دارەجەدەگى سپورت شەبەرلەرىن تاربيەلەپ شىعارعان.
