شاردارا اۋدانىندا وتكەن جىلى بىرنەشە اۋىلدىق وكرۋگتە ءبىر پاتەرلى 9 كوممۋنالدىق تۇرعىن ءۇيدىڭ قۇرىلىسى جۇرگىزىلىپ، پايدالانۋعا بەرىلدى. اعىمداعى جىلى 4 قاباتتى 40 پاتەرلى 2 تۇرعىن ءۇيدىڭ قۇرىلىسى جۇرگىزىلەدى. جالپى اۋداندا 2018 جىلى 8183،6 شارشى مەتر تۇرعىن ءۇي پايدالانۋعا بەرىلىپ، 110 وتباسى باسپانامەن قامتىلاتىن بولادى.  بۇل تۋرالى وقو وڭىرلىك كوممۋنيكاسيالار قىزمەتىندە وتكەن بريفينگتە شاردارا اۋدانىنىڭ اكىمى بولاتبەك قىستاۋوۆ ءمالىم ەتتى.



بۇدان بولەك، بيىل مەملەكەتتىك جەكەشەلىك ارىپتەستىك شەڭبەرىندە شاردارا قالاسىندا سمەتالىق قۇنى 166،5 ملن.تەڭگەنى قۇرايتىن 2 قاباتتى 10 پاتەرلى 2 تۇرعىن ءۇيدىڭ جانە ق.تۇرىسبەكوۆ اۋىلدىق وكرۋگىندە 1 تۇرعىن ءۇي قۇرىلىسى جۇرگىزىلەدى.

ينفراقۇرىلىم بويىنشا اۋدان تۇرعىندارىنىڭ 17،3 پايىزى تابيعي گاز كوزىنە قوسىلعان.



– ەلدى مەكەندەردى گازداندىرۋ بويىنشا اۋداندىق بيۋدجەت ەسەبىنەن 4 جوبا ازىرلەنۋدە. جالپى 2018-2021 جىلدار ارالىعىندا 16 ەلدى مەكەندى گازداندىرۋ جوسپارلانىپ، ناتيجەسىندە اۋدان تۇرعىندارىنىڭ 99،5 پايىزى تابيعي گازبەن قامتىلادى. ال اۋىزسۋمەن قامتاماسىز ەتۋدە اۋدانداعى 25 ەلدى مەكەننىڭ 13ء-ى ورتالىقتاندىرىلعان قۇبىر سۋىن، 3 ەلدى مەكەن  ۇڭعىما سۋىن، قالعان 9 ەلدى مەكەن تۇرعىندارى قۇدىق سۋىن تۇتىنادى. ايماقتا قۇبىر سۋىمەن 73000 ادام قامتىلعان، بۇل اۋدان تۇرعىندارىنىڭ 92 پايىزى، – دەدى بولاتبەك دۇيسەنبەك ۇلى.

بۇگىنگى تاڭدا شاردارا قالاسى، قوسسەيىت، شاردارا، كوكسۋ، ۇزىناتا اۋىلدارىندا اۋىز سۋ 24 ساعات بويى بەرىلۋدە. سونداي-اق، اۋدان تۇرعىندارىنىڭ 99،8 پايىزى ەلەكتر ەنەرگياسىمەن قامتىلعان.