شاردارا اۋدانى بالىق وڭدەۋ بويىنشا وبلىس كولەمىندە كوش باستاۋشى ايماق ەكەنى بەلگىلى. بۇگىندە اۋداندا جىلىنا 5 مىڭ توننادان استام بالىق ءونىمىن وندىرۋگە قاۋقارلى 4 بالىق وڭدەۋ زاۋىتى بار. بۇل كاسىپورىندار جىل باسىنان بەرى 1،3 ملرد. تەڭگە بولاتىن 1300 توننا بالىق وڭدەپ، ونىڭ 80 پايىزىن رەسەي، گەرمانيا، يزرايل، گرۋزيا جانە وزبەكستان سىندى ەلدەرگە ەكسپورتتالسا، 20 پايىزىن ىشكى نارىققا ساۋدالاۋدا.
شاردارا اۋدانىنىڭ الەۋمەتتىك-ەكونوميكالىق احۋالىمەن تانىسۋ ماقساتىندا ارنايى جۇمىس ساپارىمەن بارعان وڭتۇستىك قازاقستان وبلىسىنىڭ اكىمى جانسەيىت تۇيمەبايەۆ بالىق شارۋاشىلىعىمەن اينالىساتىن «حاميت» اۋىلشارۋاشىلىعى وندىرىستىك كووپەراتيۆىندە بولدى.
بالىق وڭدەۋ زاۋىتىنىڭ پروسەسىمەن تانىسقان ايماق باسشىسى بۇل شارۋاشىلىقتا كووپەرتيۆتەر قۇرۋ ارقىلى ءونىمنىڭ كولەمىن ۇلعايتۋعا بولاتىنىن جەتكىزدى.
مۇزداتىلعان، ىستالعان جانە تۇزدالعان بالىق پەن فيلە ونىمدەرىن شىعاراتىن كاسىپورىننىڭ جىلدىق قۋاتتىلىعى 2500 توننا. 250 ادامعا جۇمىس تاۋىپ بەرىپ وتىرعان بۇل زاۋىت شەت مەملەكەتتەرگە باسەكەگە قابىلەتتى بالىق ونىمدەرىن شىعارۋمەن تانىمال.
كاسىپورىننىڭ تىنىس-تىرشىلىگىنە جەتە قانىققان وبلىس اكىمى اتالعان كاسىپورىننىڭ سۋ قويماسىندا ورنالاسقان تورلى شارباقتاعى بالىق ءوسىرۋ جۇمىسىمەن دە تانىس بولدى.
سۋ قويمادا وتكەن جىلى 39 توننا بالىق قولدان ءوسىرىلىپ شىقسا، بيىل بۇل كورسەتكىش ەكى ەسەگە ۇلعايتىلىپ، ياعني، 80 تونناعا دەيىن جەتكىزىلمەك.
جالپى اۋداندا بالىقتى قولدان ءوسىرۋ جانە مولايتۋ شارۋاشىلىعىمەن اينالىساتىن 5 كاسىپورىن بولسا، ولاردا بۇگىندە 300 تونناعا جۋىق بالىق ءوسىرىلىپ جاتىر. سونداي-اق، شاردارا اۋدانىندا الداعى ۋاقىتتا بالىق وڭدەۋمەن اينالىساتىن تاعى دا ەكى شاعىن كاسىپورىن اشۋ جوسپارلانۋدا.
