الەۋمەتتىك جەلىنى كىرىس كوزىنە اينالدىرعاندار كوپ. ءبىراق اۋىلدا وتىرىپ-اق، ايىنا ميلليونداپ تابىس تاباتىندار نەكەن ساياق.
قوستاناي وبلىسىنىڭ جالداما اۋىلى. نەبارى 50 شاقتى ءتۇتىن بار مۇندا. ەلدىمەكەندەگى نەگىزگى تابىس كوزى مال شارۋاشىلىعى. ءبىراق جۇماعالييەۆتەر وتباسى زامانۋي ترەندتەردى يگەرىپ، ءتاپ-تاۋىر كىرىس كورىپ وتىر. شالعاي اۋىلداعى شاعىن شاڭىراق الەۋمەتتىك جەلى ارقىلى ايىنا 4 ميلليون اقشا تابادى.
اسلانبەك جۇماعالييەۆ، جالداما اۋىلىنىڭ تۇرعىنى:
قازىرگى ۋاقىتتا سىزدە جاقسى ينتەرنەت پەن سمارتفونىڭىز بولسا، ءسىزدىڭ قولىڭىزدان كەلەتىن نارسەلەر فانتازياڭىزبەن عانا شەكتەلەدى. وسىنداي شاعىن اۋىلدا تۇرىپ، بارلىق الەم تانيتىن، الەم كورەتىن ۆيدەولار جاساۋعا بولادى.
اسلانبەك العاشقى ميلليونىن 21 جاسىندا تاپقان. يۋتۋب جەلىسىنە بار-جوعى 1 ساعات ۋاقىتىن ءبولىپ، 10 مينۋتتىق تانىمدىق ۆيدەو دايىندايدى. ءقازىر ونىڭ قولدانىستاعى كانالىنا 1 ميلليون ادام جازىلىپ ۇلگەرگەن ەكەن. الەمگە ايگىلى جەلى اسلانبەكتىڭ ەڭبەگىن ەلەپ، كۇمىس باتىرماسىن سىيعا تارتقان.
اسلانبەك جۇماعالييەۆ، جالداما اۋىلىنىڭ تۇرعىنى:
قازاقستانداعى تانىمال بلوگەرلەردىڭ بىرىنە ينستاگرامم، يۋتۋب سترانيسالارىن دامىتۋعا كومەكتەستىم. ءسويتىپ ۋاقىت وتە كەلە ويلادىم. نەگە مەن بىرەۋلەرگە كومەكتەسىپ ءجۇرمىن، ءبىراق ءوزىم نەگە سونىمەن اينالىسپاسقا دەپ. ءسويتىپ 2019 جىلى وزىمەن كانال اشىپ، 1 جارىم جىلدا 1 ميلليون پودپيسچيك جينادىم.
"تەك عالامتوردىڭ السىزدىگى عانا قولبايلاۋ"، دەيدى جاس بلوگەر. نيەت پەن ۇمتىلىس بولسا، ول دا كەدەرگى ەمەس. ۇيدەن شىقپاي-اق الەمدى باعىندىرۋعا بولادى. وتاناسى مەن ءۇيدىڭ كەنجەلەرى دە حوببيلەرىن كىرىس كوزىنە اينالدىرىپ ۇلگەرگەن ەكەن.
اجار قوجاحمەتوۆا، جالداما اۋىلىنىڭ تۇرعىنى:
ۇلىم اسلانبەكتىڭ ايتۋى بويىنشا، ماما ۇيدە وتىرىپ تا اقشا تابۋعا بولادى. سۇيىكتى ىسىڭىزبەن اينالىسقىڭىز كەلسە، جاساعان تاماقتارىڭىزدى كۇندە ۆيدەوعا ءتۇسىرىپ وتىراسىز دا، سولاي بولاد دەگەننەن كەيىن تانىستارىم، دوستارىم تاماقتارىمدى ماقتاپ جاتادى. باسىندا قورقىنىش بولدى، ىدىستارىم ونشا ەمەس، قالاداعىداي اسحانام جوق دەپ. ىڭعايسىزداندىم. ءبارى شىنايى، شىنايىلىقتى جاقسى كورەدى.
ءقازىر جەلى قولدانۋشىلارى جىلتىراعان ومىردەن جالىعىپ، بارىنشا شىنايىلىققا بەت بۇرۋدا. سوندىقتان دا جۇماعاليۆتەر وسى باعىتتى ۇستانعان. دۋبايداعى دەمالىستا جاسالعان كونتەنتتەن گورى، قورا-قوپسىدا سيىر ساۋىپ جۇرگەن ۆيدەولار كوپ كورىلىم جينايدى. "وسى ورايدا، ماڭىزدىسىن ۇمىتپاعان ءجون"، دەيدى جۇماعالييەۆتەر. ينتەرنەت ارقىلى اقشا تابامىن دەپ، جەڭىلدىڭ ءۇستى، اۋىردىڭ استىمەن ءجۇرۋدى ادەتكە اينالدىرماۋ.
https://youtu.be/U21aPrGXqmE
