بوكستان وليمپيادا چەمپيونى سەرٸك سەپيەۆكە كەسٸپقوي بوكسقا اۋىسۋ ٷشٸن ميلليون دوللار ۇسىنعان. الايدا سپورتشى ول كەزدە مانسابىن جالعاستىرۋدى ويلاماعان. وليمپيادادان كەيٸن ول قازاقستاننىڭ بوكس فەدەراتسيياسىندا جۇمىس ٸستەپ, كەيٸن «Astana Arlans» كلۋبىن باسقارعان. بۇل تۋرالى سەرٸك سەپيەۆ ٶزٸ ايتىپ بەردٸ, دەپ حابارلايدى dalanews.kz.
سەرٸك سەپيەۆكە ميلليون دوللارلىق ۇسىنىس جاسالعان
وليمپيادادان كەيٸن سەرٸك سەپيەۆتٸڭ كەسٸپقوي بوكسقا اۋىسۋىنا مٷمكٸندٸك بولعان. ونىڭ ايتۋىنشا, سول كەزدە كەسٸپقوي بوكسقا ٶتۋ تۋرالى ۇسىنىستار تٷسكەن.
«مەنٸڭ ٶمٸرٸم ٶز اعىسىمەن جٷرٸپ جاتتى. سپورتتان كەتكەننەن كەيٸن, ەرينە, كەسٸپقوي بوكسقا اۋىسۋ تۋرالى ۇسىنىستار بولدى. بٸز گولوۆكيننٸڭ جەكپە-جەگٸن كٶرۋگە بارعان كەزدە پروموۋتەرلەردٸڭ بٸرٸ ماعان ميلليون دوللار ۇسىندى», – دەدٸ ول.
سەپيەۆتٸڭ سٶزٸنشە, ۇسىنىستى ايتقان ادام ارگەنتينالىق بوكسشى سەرحيو مارتينەستٸڭ پروموۋتەرٸ بولعان.
«ول كەلٸسٸمشارتقا قول قويۋىم ٷشٸن ميلليون دوللار بەرۋگە دايىن ەكەنٸن ايتتى. بٸراق مەن ول كەزدە اعىلشىنشا سٶيلەي المايتىنمىن. سودان ول بۇرىلىپ, كەتٸپ قالدى. كەيٸن ماعان ونىڭ ميلليون دوللار ۇسىنعانىن اۋدارىپ بەردٸ. مەن بولسام: “جاقسى ەكەن”, – دەپ قويا سالدىم», – دەپ ەسكە الدى وليمپيادا چەمپيونى.
سەرٸك سەپيەۆتٸڭ ايتۋىنشا, سول كەزدە ول اقشا تابۋدى باستى ماقسات ەتٸپ قويماعان. ونىڭ ٷستٸنە, سپورتتان تىس جاڭا ٶمٸرٸ قالىپتاسا باستاعان ەدٸ.
«وليمپياداداعىداي جۇدىرىقتاسا المايمىن دەپ ويلادىم»
وليمپيادا چەمپيونى سپورتتىق مانسابىن اياقتاعاننان كەيٸن قازاقستاننىڭ بوكس فەدەراتسيياسىندا جۇمىس ٸستەگەن. كەيٸن «Astana Arlans» بوكس كلۋبىن باسقارعان.
«مەنٸڭ بوكسقا قاتىسى جوق باسقا ٶمٸرٸم باستالعانىنا بٸر جارىم جىلداي ۋاقىت ٶتكەن ەدٸ. سول كەزدە كەسٸپقوي بوكسقا اۋىسسام, بۇرىنعى بابىمدا بولمايمىن دەپ ويلادىم. سوندىقتان ول جاققا بارىپ, وليمپياداداعىداي ٶنەر كٶرسەتە الماسام, نە ٷشٸن بارۋىم كەرەك دەپ ەسەپتەدٸم», – دەدٸ سەپيەۆ.
دەگەنمەن ول كەسٸپقوي بوكستا قاجەتتٸ بابىنا قايتا كەلۋگە مٷمكٸندٸك بولعانىن دا جوققا شىعارمايدى. ونىڭ پٸكٸرٸنشە, سول كەزدەگٸ كٶزقاراسى بويىنشا, سپورتتىق فورماسىن بۇرىنعى دەڭگەيدە ساقتاي المايتىنىنا سەنٸمدٸ بولعان.
باپكەرٸ مانسابىن اياقتاۋعا كەڭەس بەرگەن
سەرٸك سەپيەۆتٸڭ ايتۋىنشا, ەگەر كەسٸپقوي بوكسقا اۋىسۋ تۋرالى ۇسىنىس وليمپيادادان كەيٸن بٸردەن تٷسكەندە, شەشٸمٸ باسقاشا بولۋى مٷمكٸن ەدٸ. بۇل رەتتە باپكەرٸنٸڭ پٸكٸرٸ دە ماڭىزدى رٶل اتقارعان.
«باپكەرٸمنٸڭ ماعان ىقپالى زور بولدى. ول: “بولدى, سەن بەرٸنە قول جەتكٸزدٸڭ. سپورتتىق مانسابىڭدى اياقتا دا, جۇمىس ٸستەۋگە كٸرٸس”, – دەدٸ», – دەپ بٶلٸستٸ بوكسشى.
سەپيەۆتٸڭ سٶزٸنشە, سول كەزدە قازاقستاننىڭ بوكس فەدەراتسيياسى دا ونى قولداپ, جۇمىسقا قابىلداعان. سونىڭ ارقاسىندا ول سپورتتان كەيٸنگٸ ٶمٸرٸن جاڭا باعىتتا جالعاستىرا العان.
«ماعان بوكس فەدەراتسيياسىنىڭ قولداۋ كٶرسەتكەنٸ جاقسى بولدى. ولار مەنٸ جۇمىسقا قابىلدادى. ونىڭ ٷستٸنە, ەندٸ رينگتە باسىڭدى سوققىعا از بەرەسٸڭ عوي. بۇل دا ٷلكەن ارتىقشىلىق», – دەپ ەزٸلدەدٸ وليمپيادا چەمپيونى.
