مەملەكەت جانە قوعام قاۋىپسىزدىگىن قامتاماسىز ەتۋ ماسەلەلەرى بويىنشا ارنايى وڭىرىمىزگە كەلگەن دەلەگاتتاردى وبلىس اكىمى جانسەيىت تۇيمەبايەۆ كۇتىپ الدى. جۇمىس توبىنىڭ قۇرامىندا كوميتەت مۇشەلەرى سەناتورلار ي.ادىربەكوۆ، م.التىنبايەۆ، ن.ابىقايەۆ، س.جاقسىبەكوۆ، ل.قيىنوۆ، گ.كيم بار.
جۇمىسشى توپ ەڭ الدىمەن قازاقستان قارۋلى كۇشتەرىنىڭ شىمكەنت گارنيزونىندا بولىپ، جەكە قۇرامنىڭ كۇندەلىكتى تىنىس-تىرشىلىگىمەن تانىستى. سونداي-اق، اۆياسيالىق بازانىڭ اسكەري بولىمدەرىندەگى جاۋىنگەرلىك كەزەكشىلىكتىڭ ۇيىمداستىرىلۋىن، سۋ-25، ميگ-29 ۇشاقتارى مەن مي-17، مي-171ش جانە مي-35م تىكۇشاقتارى تۇرعان اۋە شابۋىلىنا قارسى قورعانىس اسكەرلەرىن كورىپ شىعىپ، شەكارا قىزمەتى بولىمشەلەرىنىڭ جاۋىنگەرلىك ازىرلىگى ماسەلەلەرىن زەردەلەدى.
سەناتورلار سونىمەن قوسا، راديوتەحنيكالىق جانە زەنيتتىك زىمىران ەسەپتوپتارى مەن اسكەري اۆياسيا ەكيپاجدارىنىڭ جاۋىنگەرلىك مۇمكىنشىلىكتەرىن تاماشالادى.
شىمكەنت گارنيزونىنىڭ جۇمىسىمەن تانىسقان جۇمىسشى توپ اۋە قورعانىسى كۇشتەرىنىڭ شەكارا قىزمەتى جانە اۋە قوزعالىسى ورگاندارىمەن ءوزارا ءىس-قيمىلدىڭ جاقسى ۇيىمداستىرىلعانىن اتاپ ءوتتى.
وسى كۇنى، دەلەگاتتار ق ر ۇلتتىق ۇلانى «وڭتۇستىك» وڭىرلىك قولباسشىلىعىنىڭ شىمكەنت قالاسىنداعى 6506 اسكەري ءبولىمىنىڭ جۇمىسىمەن تانىستى. وندا ولار جاۋىنگەرلىك قىزمەتى مەن اسكەردىڭ جەكە قۇرامىنا جۇكتەلگەن قۇقىق قورعاۋ مىندەتتەرىن جانە تەحنيكانىڭ، قارۋ-جاراق پەن قورعاۋ قۇرالدارىنىڭ جاڭا ۇلگىلەرىن ارالاپ كوردى. «جاس بۇركىت» اسكەري-پاتريوتتىق كلۋبىنىڭ جاۋىنگەرلىك ادىس-تاسىلدەرىنەن قويىلىمدار تاماشالاپ، ىشكى اسكەردىڭ 1995 جىلى تاجىك-اۋعان شەكاراسىندا قازا تاپقان جاۋجۇرەك 17 جاۋىنگەرىنىڭ ەسكەرتكىشىنە تاعزىم جاسادى.
ايتا كەتەيىك، داريعا نازاربايەۆا باستاعان جۇمىسشى توپ وبلىسقا جاساعان ەكى كۇندىك ساپارىندا س.راحيموۆ اتىنداعى «جاس ۇلان» رەسپۋبليكالىق اسكەري مەكتەبىندە جانە وڭتۇستىك قازاقستان اۋماعىنداعى كەدەندىك بەكەتتەردىڭ جۇمىسىمەن تانىسۋ جوسپارلانۋدا.
وقو اكىمىنىڭ باسپا ءسوز قىزمەتى
