پارتيا ءتوراعاسىنىڭ ورىنباسارى بەرىك دۇيسەمبينوۆ پارتيا ساياسي باعدارلاماسىنىڭ التى باسىم باعىتىن اتادى: تاۋەلسىزدىك پەن «الاش» ۇلتتىق يدەياسى، دەموكراتيا مەن پارلامەنتاريزم، سىبايلاس جەمقورلىق جانە دە-وفشوريزاسيامەن كۇرەس، الەۋمەتتىك ادىلەتتىلىك، نارىقتىق ەكونوميكا جانە كاسىپكەرلىكتى قولداۋ، سىرتقى ساياسات. ول سىبايلاس جەمقورلىقپەن كۇرەسكە قاتىستى ماسەلەگە ەگجەي-تەگجەيلى توقتالىپ، «اق جول» دەموكراتيالىق پارتياسى قىلمىستىق-اتقارۋ جۇيەسىندە جازاسىن وتەپ جاتقان جەمقور شەنەۋنىكتەردى شارتتى تۇردە مەرزىمىنەن بۇرىن بوساتۋعا زاڭ جۇزىندە تىيىم سالۋ قاجەت دەپ سانايتىنىن ايتتى.
«اق جول» دەپۋتاتتارى 2019 جىلدان بەرى بۇل ۇسىنىستى بىرنەشە رەت ەنگىزدى، 2020 جىلى مۇنداي نورما قازاقستان رەسپۋبليكاسىنىڭ قىلمىستىق كودەكسىندە، ءبىراق اۋىر جانە اسا اۋىر سىبايلاس جەمقورلىق قىلمىستارعا قاتىستى عانا قابىلداندى. بۇل جەتكىلىكسىز دەپ ەسەپتەيمىز جانە بارلىق جەمقور شەنەۋنىكتەردى شارتتى تۇردە مەرزىمىنەن بۇرىن بوساتۋعا تىيىم سالۋدى تالاپ ەتەمىز.
سونىمەن قاتار، ءادىل سايلاۋ ماسەلەسى كوتەرىلدى. «اقجولدىقتار» مۇعالىمدەردى بوگدە جۇمىسقا تارتۋعا تىيىم سالۋ، مۇعالىمدەردىڭ سايلاۋ كوميسسيالارىنا قاتىسۋىن شەكتەۋ، ققس-تىڭ سارالانعان مولشەرلەمەلەرىن ەنگىزۋ، ينفلياسيامەن كۇرەس، يپوتەكالىق نەسيەنىڭ جوعارى پايىزدىق مولشەرلەمەسى تۋرالى ايتتى.
كانديداتتار «اق جول» دەموكراتيالىق پارتياسى ۇكىمەت قۇرامىن مەملەكەت باسشىسى ەمەس، پارلامەنتتىك سايلاۋدا جەڭىسكە جەتكەن پارتيا جاساقتاپ، ونى پرەزيدەنتتىڭ بەكىتۋىنە ۇسىنىپ، سول ۇكىمەتتىڭ جەتىستىكتەرى مەن ساتسىزدىكتەرىنە جاۋاپتى بولۋى كەرەك دەپ سانايتىنىن ەسكە سالدى.
جينالعاندار زەينەت جاسىن تومەندەتۋ، الەۋمەتتىك باسپاناعا قاتىستى سۇراقتار قويدى. سونداي-اق، ۇكىمەت الدىندا اۋىل شارۋاشىلىعىن قولداۋ ماسەلەسىن كوتەرۋدى سۇرادى. قىزمەتكەرلەر اقجولدىق كانديداتتارعا كەزدەسۋ ءۇشىن العىس ايتىپ، قولداۋ ءبىلدىردى.
رەسپۋبليكالىق شتاب مۇشەلەرى سايلاۋشىلاردىڭ سوزدەرى مەن ۇسىنىستارىن نازارعا الدى.
*ماتەريالدىڭ اقىسى «اق جول» دەموكراتيالىق پارتياسىنىڭ سايلاۋ قورىنان تولەندى.
