سەمەيدە ستارتاپتاردى قولدايتىن بيزنەس-ينكۋباتور جوباسى ناۋرىزدا باستالادى

Dalanews 19 اقپ. 2024 18:01 1116

اباي وبلىسىنىڭ وڭىرلىك كوممۋنيكاسيالار قىزمەتى الاڭىندا "سەمەي قالاسىنىڭ ىشكى ساياسات ءبولىمى" مم باسشىسى نۇرجان ەسەنجولوۆ "سەمەي قالاسىنداعى ستارتاپتاردى قولدايتىن بيزنەس-ينكۋباتور جوباسى" تۋرالى اقپارات بەردى، دەپ حابارلايدى Dalanews.kz.

جوبا جاس كاسىپكەرلەردىڭ قىزمەتىنىڭ دامۋىنا قولايلى جاعداي جاساپ، پروبلەمالاردى بىرلەسىپ شەشۋ، دامىتۋ جانە كاسىپكەر بولۋعا ىنتالى جاستاردى قولداۋ ماقساتىندا قۇرىلعان.سونىمەن قاتار، ءبولىم باسشىسى مەملەكەتتىك جاستار ساياساتىنىڭ ىسكە اسىرىلۋ بارىسى جايلى دا اتاپ ءوتتى.

"ەڭبەك نارىعىندا سۇرانىسقا يە ماماندىقتار بويىنشا قىسقا مەرزىمدى كاسىپتىك وقىتۋعا دانەكەرلەۋشىلەر، تىگىنشىلەر، اسپازدار، كران ءماشينيسى جانە باسقا دا ماماندىقتاردىڭ 22 ادامى جىبەرىلدى. 2023 جىلعى جەلتوقسانداعى جاعداي بويىنشا NEET ساناتىندا 1 313 جاس تىركەلدى"، - دەدى نۇرجان ەسەنجولوۆ.

بيزنەس-ينكۋباتور جوباسىنا 35 جاسقا دەيىنگى كەز-كەلگەن جاستاردىڭ قاتىسۋعا مۇمكىندىگى بار. ەڭ باستىسى جاستاردىڭ  يدەياسى جانە ونى ۇسىنۋى ەكەندىگىن جەتكىزدى قالالىق ءماسليحات دەپۋتاتى مادينا ەدىلبەكوۆا.

"بىزدە كوپتەگەن كاسىپكەرلەر مەن ستارتاپەرلەر بار. ءبىراق ولاردىڭ كوپشىلىگى، اسىرەسە جاستار، كىمگە جۇگىنۋ كەرەكتىگىن جانە جوسپار قۇرۋدى بىلمەيدى. اقپاراتتىق تەحنولوگيالار عاسىرىندا ءبىز ۋاقىتپەن بىرگە ءجۇرۋىمىز كەرەك. سەمەي اكىمىنىڭ قولداۋىمەن ءبىز باعدارلامانى ستارتاپەرلەرمەن بىرلەسىپ ۇيىمداستىردىق. مىسالى: كوپتەگەن قىزدار ۇيدە نان پىسىرۋمەن اينالىسادى، ءبىراق ونى بيزنەسكە قالاي اينالدىرۋعا بولاتىنىن بىلمەيدى، كومەك سۇرايتىن جەرلەرىن دە بىلمەيدى. مىنە، وسى جاستارعا، ياعني ءىسىن جاڭا باستاعان كاسىپكەرلەرگە كومەكتەسەمىز"  - دەپ اتاپ ءوتتى مادينا ەدىلبەكوۆا.

سونداي-اق، دەپۋتات قالا اكىمشىلىگى جاستاردى قارسى الۋعا جانە ونىمەن جۇمىستى بارىنشا ءتيىمدى ەتۋگە دايىن ەكەنىن ايتتى.

"ءبىز جۇمىس ىستەۋگە ىنتالى، ءوز ءىسىن دامىتۋعا، ۇلكەن پايدا تابۋعا ۇمتىلاتىن جاستاردى قولداۋعا دايىنبىز. بۇل ءبىزدىڭ جاستارىمىز ءۇشىن جاقسى باستاما دەپ ويلايمىن"، - دەپ قورىتىندىلادى مادينا ەدىلبەكوۆا.


ۇسىنىلعان
سوڭعى جاڭالىقتار
x