بۇگىن اباي وبلىسىنىڭ اكىمى بەرىك ءۋالي سەمەي مەديسينا ۋنيۆەرسيتەتىنە بارىپ، وقۋ ورنىنىڭ قىزمەتىمەن تانىستى، - دەپ حابارلايدى Dalanews.kz
قازىرگى تاڭدا ۋنيۆەرسيتەتتە 6 مىڭنان استام ستۋدەنت وقيدى. وقۋ ورنىنا قاراستى فيليالداردى قوسا العاندا 3167 ادام جۇمىس ىستەيدى، 400-دەن استام پروفەسسور-وقىتۋشى قىزمەت ەتەدى. ولاردىڭ ىشىندە 35 عىلىم دوكتورى، 133 عىلىم كانديداتى، PhD دوكتورلار مەن تاجىريبەلى مەديسينا ماماندارى بار. ۋنيۆەرسيتەت قۇرامىندا 60-قا جۋىق كافەدرا مەن عىلىمي-زەرتتەۋ بولىمشەلەرى جۇمىس ىستەيدى.
وقۋ ورنى حالىقارالىق سەرىكتەستىككە باسىمدىق بەرەدى. الەمنىڭ 70-تەن استام جەتەكشى ۋنيۆەرسيتەتتەرىمەن بايلانىس ورناتقان. شەتەلدىك ستۋدەنتتەر قاتارى جىل سايىن ارتىپ كەلەدى. قازىرگى تاڭدا 10-نان استام ەلدىڭ 500-گە جۋىق ازاماتى وسىندا وقىپ ءجۇر.
وبلىس اكىمى ۋنيۆەرسيتەتتىڭ باس كورپۋسىنداعى مۋزەيدى، كىتاپحانانى، ۆيرتۋالدى بەينەستۋديا زالدارىن ارالاپ، ارداگەر ۇستازدارمەن، وقىتۋشىلارمەن، ستۋدەنتتەرمەن كەزدەستى.
وقۋ ورنىنىڭ رەكتورى ايماق باسشىسىنا «سيفرلىق ۋنيۆەرسيتەت» جوباسىن تانىستىردى.
ايماق باسشىسى ۋنيۆەرسيتەت جانىنداعى 465 ورىندىق گوسپيتالدە بولدى. مۇندا جىل سايىن 20 مىڭنان استام ناۋقاس ەمدەلىپ، 37 مىڭعا جۋىق ازامات امبۋلاتوريالىق كومەك الادى.
ايماق باسشىسى مەديسينالىق مەكەمەدەگى كومپيۋتەرلىك توموگراف، انگيوگراف قۇرىلعىلارىنىڭ، وپەراسيالىق بلوكتاردىڭ جۇمىسىمەن تانىسىپ، تەلەمەديسينا ورتالىعى مەن بالالار ستاسيونارىن ارالادى. پەدياتريا بولىمىندە ەمدەلىپ جاتقان بالالاردىڭ حال-جاعدايىن ءبىلىپ، ولارعا سىيلىقتار ۇسىندى. ۋنيۆەرسيتەتتىك گوسپيتالدە ءبىرقاتار وزەكتى ماسەلەلەر بار. عيماراتتىڭ شاتىرى، ىشكى بولمەلەرى مەن ينجەنەرلىك جەلىلەرى، كومپيۋتەرلىك توموگراف جاڭارتۋدى قاجەت ەتەدى. قازان ايىنان ساۋىرگە دەيىنگى ەپيدەميالىق ماۋسىمدا بالالارعا ارنالعان پۋلمونولوگيالىق توسەك ورىندارى جەتىسپەيدى.
نەيروحيرۋرگيا جانە نيەۆرولوگيا بولىمدەرىندە ەمدەلۋشى سانى كوپ بولعاندىقتان ورىن تاپشىلىعى سەزىلەدى. ۋنيۆەرسيتەت رەكتورى التاي ءدۇسىپوۆ وبلىس اكىمىنە گوسپيتال جانىنداعى دەنساۋلىق ساقتاۋ باسقارماسىنا قاراستى بوس تۇرعان ءۇش قاباتتى عيماراتتى جاڭعىرتىپ، نەيروينسۋلت ورتالىعىنا اينالدىرۋ تۋرالى ۇسىنىسىن جەتكىزدى.
ايماق باسشىسى سەمەي مەديسينا ۋنيۆەرسيتەتىنىڭ ءوڭىردىڭ دەنساۋلىق ساقتاۋ سالاسىندا الاتىن ورنى زور ەكەنىن اتاپ ءوتتى.
«سەمەي مەديسينا ۋنيۆەرسيتەتى – ايماققا عانا ەمەس، ەلىمىزگە مەديسينالىق كادر دايارلاپ وتىرعان جەتەكشى وقۋ ورىندارىنىڭ ءبىرى. تۇلەكتەرى الماتى، استانا قالالارىنداعى رەسپۋبليكالىق دەنساۋلىق ساقتاۋ نىساندارىندا جۇمىس ىستەپ ءجۇر. ءبىلىم ورداسىنىڭ كلينيكالىق بازاسى، عىلىمي الەۋەتى مەن ينفراقۇرىلىمى ايماق مەديسيناسىنىڭ دامۋىنا تىكەلەي اسەر ەتەدى. بۇگىن ارنايى كەلىپ، ۋنيۆەرسيتەتتىڭ تىنىس-تىرشىلىگىمەن، اتقارىلعان جۇمىستارمەن، جوبا-جوسپارلارمەن تانىستىم. وسى باعىتتاعى جۇمىستى جالعاستىرۋ كەرەك. اباي وبلىسىندا جۇرەك-قان تامىرلارى اۋرۋلارى بويىنشا كورسەتكىش وتە جوعارى. سوندىقتان نەيروينسۋلت ورتالىعىن اشۋ باستاماسىن قولدايمىن. اكىمدىك تاراپىنان ءتيىستى قولداۋ كورسەتەمىز. بىرلەسىپ جۇمىس ىستەيتىن بولامىز»، - دەدى وبلىس اكىمى.
