سەمەي قالاسىنىڭ قاراعايلى جانە يۋنوست ىقشام اۋداندارىندا ساياباقتار سالىنادى. اباي وبلىسىنىڭ اكىمى بەرىك ءۋالي جاڭادان بوي كوتەرەتىن نىسانداردىڭ جوباسىمەن تانىستى، دەپ حابارلايدى Dalanews.kz
«يۋنوست» شاعىن اۋدانىنداعى ساياباقتا كىشى ساۋلەت نىساندارىن ورناتۋ، فۋتبول، باسكەتبول، بالالارعا ارنالعان ويىن الاڭدارىن سالۋ جوسپارلانعان. دەمالىس ورنىنىڭ جالپى ۇزىندىعى 1 شاقىرىمدى قۇرايدى.
قاراعايلى شاعىن اۋدانىندا سالىناتىن ساياباقتا جاسىل جەلەك وتىرعىزىلىپ، سەرۋەن جولدارى، ساحنا جانە مادەني-كوپشىلىك ءىس-شارالارعا ارنالعان الاڭدار بوي كوتەرەتىن بولادى.
ساياباق زاماناۋي تالاپتارعا ساي جابدىقتالىپ، تۇرعىندارعا جايلى ورتا قالىپتاستىرۋعا باعىتتالعان.
وبلىس اكىمى مەردىگەر كومپانيا وكىلدەرىنە قۇرىلىستى باستاپ،ساپالى ءارى مەرزىمىندە اياقتاۋدى تاپسىردى.
"بۇل ساياباقتاردىڭ ەرەكشەلىگى، حالىققا قىزمەت كورسەتەتەتىن، تۇرعىنداردىڭ دەمالۋىنا، بالالاردىڭ الاڭسىز ويناۋىنا مۇمكىندىك بەرەتىن قوعامدىق ورىندار قاراستىرىلعان. سەمەيدى جاسىل جەلەكتى قالاعا اينالدىرۋ ءۇشىن شاھارداعى ساياباقتار سانىن كوبەيتۋىمىز كەرەك. تەك قانا بۇگىنگى سەنبىلىك بارىسىندا شاھاردا 400-گە جۋىق شىرشا، كوك تەرەك كوشەتتەرى وتىرعىزىلدى. بۇل باعىتتاعى جۇمىستى جانداندىرامىز. وبلىس ورتالىعىنداعى باسقا ساياباقتاردى دا جاڭعىرتىپ، جاڭارتاتىن بولامىز"، – دەدى ايماق باسشىسى.
