اكىمنىڭ ايتۋىنشا، ابايدىڭ 175 جىلدىعىن دايىنداۋ جانە وتكىزۋ جونىندەگى مەملەكەتتىك كوميسسيانىڭ ءتوراعاسى قىرىمبەك كوشەربايەۆ سەمەيدەگى بارلىق نىسانداردى قاراپ شىقتى. ونىڭ اراسىندا جاڭارتىلعان اباي الاڭى بار جانە 3 ترۋپپا قىزمەت ەتەتىن اباي تەاترى اكتەرلەر ءۇشىن عانا ەمەس، قالا تۇرعىندارى ءۇشىن دە ناعىز سىي بولدى.
بۇل رەتتە اباي مۋزەيى دە جاڭاشا كەلبەتتە كورىندى. كەلۋشىلەر ۇلى اقىنعا تيەسىلى جادىگەرلەردى، قۇجاتتاردى قاراپ قانا قويماي، مۋلتيمەديالىق جوبا كومەگىمەن ابايدىڭ ءومىر سۇرگەن كەزەڭىنە ساياحاتتاپ، ۇلتتىق اسپاپتاردىڭ قالاي دىبىستايتىنىن ەستي الادى.
– مۋزەيدىڭ ورتالىق بولىگىندە «اباي جانە ۇلدارى» ءمۇسىنى قويىلعان. اۆتورلار مۇندا پورترەتتىك ۇقساستىقتى عانا ەمەس، باستى ويدى – ۇلداردىڭ ۇلى اكەسىنە دەگەن ماحابباتى مەن ماقتانىشىن دا جەتكىزە الدى، – دەپ اتاپ ءوتتى د.احمەتوۆ.
سونىمەن بىرگە، اكىم اقشوقى اۋىلىندا اقىننىڭ وتباسىنا ارنالعان مۋزەي اشىلعانىن جەتكىزدى. ال قاراۋىل اۋىلىنداعى جاڭا مەكتەپتە زاماناۋي IT جانە فيزيكا، حيميا، روبوتوتەحنيكا سىنىپتارىنان بولەك جاس جۋرناليستەردىڭ مۋلتيمەديالىق ستۋدياسى دا بار. اباي ساياباعى ماڭىندا كەلەشەكتە جاڭا زاماناۋي شاعىناۋدان سالىنادى.
– ارينە، باستى نىسان – جيدەبايداعى مەموريالدىق كەشەن. «اباي – شاكارىم» كەشەنىنىڭ جاڭا كەلبەتى، زاماناۋي ارحيتەكتۋرالىق فورمالارى نىساننىڭ ماڭىزىن ارتتىرا تۇسكەنى ءسوزسىز. بۇل قازاقستاندىقتار مەن قوناقتارىمىزدىڭ ەڭ كوپ باراتىن جەرى بولارىنا سەنىمدىمىن، – دەدى دانيال احمەتوۆ.
