«سەمەي ورمانى» فيليالىنىڭ باسشىسى ءورتتى سوندىرۋدەگى سالعىرتتىق ءۇشىن جاۋاپقا تارتىلادى. بۇعان دەيىن پرەمەر-مينيستر ولجاس بەكتەنوۆ پاۆلودار جانە اباي وبلىستارىنداعى ورمان ورتتەرى ءۇشىن لاۋازىمدى تۇلعالاردى ايىپتاپ، ەكولوگيا مينيسترلىگىنە كىنالىلەردى جازالاۋدى تاپسىرعان ەدى، دەپ حابارلايدى Dalanews.kz.
ەكولوگيا جانە تابيعي رەسۋرستار ءمينيسترى ەرلان نىسانبايەۆ موروزوۆ ورمان شارۋاشىلىعى اۋدانىنا قاراستى «سەمەي ورمانى» كاسىپورنىنىڭ جاڭا باسشىلىعىن جاۋاپتى دەپ ەسەپتەيدى.
«توتەنشە جاعدايلار مينيسترلىگىمەن بىرلەسىپ تەكسەرۋ جۇرگىزدىك. ءورت تۋرالى دەر كەزىندە حابار بەرمەگەن جاۋاپتى تۇلعالارعا قاتىستى شارالار قابىلدانباق. بۇل تۋرالى ەڭ الدىمەن موروزوۆ فيليالىنىڭ باسشىسى حابارلاۋى ءتيىس ەدى»، – دەدى نىسانبايەۆ ۇكىمەتتەگى باسپا ءسوز ءماسليحاتىندا.
ءورت تۋرالى مالىمەت الدىمەن «سەمەي ورمانى» ديسپەچەرلىك پۋنكتىنە، كەيىن وبلىستىق تج دەپارتامەنتىنە، ودان سوڭ مينيسترلىككە جانە بىرىككەن ۇيلەستىرۋ ورتالىعىنا جەتۋى ءتيىس. بۇل ورتالىقتا تاۋلىك بويى ورمان شارۋاشىلىعى، توتەنشە جاعدايلار قىزمەتى جانە باسقا قۇرىلىمداردىڭ وكىلدەرى كەزەكشىلىك اتقارادى.
2023 جىلى «سەمەي ورمانى» اۋماعىندا بولعان قايعىلى وقيعا ءۇشىن ەكولوگيا مينيسترلىگى مەن ءتجم-نىڭ ءبىرقاتار شەنەۋنىكتەرى جاۋاپكەرشىلىككە تارتىلعان بولاتىن.
