اۋداندا جاڭادان 101 گەكتار جەرگە تامشىلاتىپ سۋعارۋ جۇيەسى ەندىرىلىپ، جالپى كولەمى 601 گەكتارعا جەتكەن. جىلىجايلاردىڭ جالپى كولەمى 52 گەكتاردى قۇراسا، قارقىندى باۋ 20 گا جەرگە ەگىلىپ، كولەمى 500 گەكتارعا جۋىقتاعان.
«بيىلعى جىلى اۋداندا اۋىل شارۋاشىلىعى سالاسىندا 4 جاڭا جوبا ىسكە قوسىلادى. ولار: قايناربۇلاق اۋىل وكرۋگىندەگى "نۇر اگرو" جشس-ڭ 1،5 گەكتارلىق جىلىجاي كەشەنى، جوبانىڭ جالپى قۇنى - 1 ملرد تەڭگە. سونداي-اق، "كومەشبالىق" جشس-ڭ جىلىنا 900 توننا بالىق ءونىمىن وندىرەتىن شاباق ءوسىرۋ جوباسى. جوبانىڭ قۇنى - 50 ملن تەڭگە. سونىمەن قاتار، كولكەنت اۋىل وكرۋگىندەگى "Food production LTD" جشس-ڭ 29 گەكتارلىق قارقىندى باۋ كەشەنى، جوبا قۇنى - 400 ملن تەڭگە. ءتورتىنشى، مانكەنت اۋىل وكرۋگىندەگى "تۋران اگرو ەت-سۇت" وندىرىستىك كووپەراتيۆىنىڭ - ءسۇتتى قايتا وڭدەۋ سەحى، جوبا قۇنى 100 ملن تەڭگە. جوبالاردى ىسكە اسىرۋ بارىسىندا قوسىمشا 6 ملرد-تان استام تەڭگەنىڭ اۋىل شارۋاشىلىعى ونىمدەرى ءوندىرىلىپ، جاڭادان 380 جۇمىس ورنى اشىلادى»، - دەدى ۇلاسبەك سادىبەك ۇلى.
اۋداندا بارلىق شارۋاشىلىقتاردا مال باسى كوبەيگەن. التى ايدا ەت ءوندىرىسى 9،3%-عا، ءسۇت – 5%-عا، جۇمىرتقا – 5،5%-عا ارتىپ وتىر. جىل باسىنان اۋدان كاسىپكەرلەرى الىس-جاقىن شەتەلدەرگە جالپى كولەمى 9 250 توننا ەت ەكسپورتتاعان، بۇل بىلتىرعى جىلعا قاراعاندا 4،5 مىڭ تونناعا ارتىق. جالپى، اۋداندا جىلدان-جىلعا مال بورداقىلاۋ الاڭدارى ارتىپ كەلەدى. ماسەلەن، ءقازىردىڭ وزىندە اۋدانداعى 1 012 مال بورداقىلاۋ الاڭدارى ءبىر مەزەتتە 42 مىڭ باس مالدى بورداقىلاۋعا قاۋقارلى.
