ساياسي ارانداتۋشىلاردىڭ كوپشىلىگى ءانونيمدى تۇردە ارەكەت ەتەدى. بۇل تۋرالى ۇلتتىق قاۋىپسىزدىك كوميتەتىنىڭ (ۇقك) ءتوراعاسى ەرمەك ساعىمبايەۆ مالىمدەدى، - دەپ حابارلايدى Dalanews.kz.
"ۇقك اقپاراتتىق كەڭىستىكتە دەسترۋكتيۆتى اقپارات تاراتۋمەن اينالىساتىن ادامداردىڭ ارەكەتتەرىن انىقتاۋ جانە الدىن الۋ بويىنشا قارقىندى ءارى جۇيەلى جۇمىس جۇرگىزۋدە. جىل باسىنان بەرى ينتەرنەتتە زاڭسىز ارەكەتتەرگە، سونىڭ ىشىندە جاپپاي تارتىپسىزدىكتەرگە شاقىراتىن دەسترۋكتيۆتى اقپارات تاراتقان 330 جەلى پايدالانۋشىسى انىقتالدى. 29 ادام قىلمىستىق جاۋاپكەرشىلىككە تارتىلدى، 30 ادام اكىمشىلىك جاۋاپكەرشىلىككە تارتىلدى، قالعاندارى بويىنشا الدىن الۋ شارالارى جۇرگىزىلدى. الايدا ينتەرنەتتەگى ساياسي سيپاتتاعى ارانداتۋلاردىڭ اۆتورلارىنىڭ باسىم كوپشىلىگى ءانونيمدى جانە ءجيى شەتەلدىك پلاتفورمالاردا تىركەلەدى"، – دەدى ساعىمبايەۆ ەرمۇرات ءباپيدىڭ دەپۋتاتتىق ساۋالىنا جاۋاپ بەرىپ.
ۇقك باسشىسى اتالعان جاعدايدا ارانداتۋشىلاردى ىزدەۋ مەن سايكەستەندىرۋدىڭ قيىن ەكەنىن اتاپ ءوتتى.
"ءسىزدىڭ سۇرانىسىڭىزدا كورسەتىلگەن فاكتىلەر نازارعا الىندى جانە بولاشاقتا جۇمىستا ەسكەرىلەتىن بولادى. ەگەر ءسىزدىڭ سۇراۋىڭىزدا كورسەتىلگەن ءمان-جايلار بويىنشا جاڭا مالىمەتتەر نەمەسە فاكتىلەر انىقتالسا، ولاردى بىزگە حابارلاۋىڭىزدى سۇرايمىز"، – دەپ قورىتىندىلادى ساعىمبايەۆ.
