مينيستر ساياسات نۇربەك وقۋ ورىندارىندا ديپلوم ساتىلۋىنا قاتىستى پىكىر ءبىلدىردى، - دەپ حابارلايدى Dalanews.kz.
"مۇنداي دەرەكتەر كوبەيىپ بارادى. ءتىپتى دەپۋتاتتار دا ديپلومدى ساتىپ الۋعا تىرىسادى. مۇنداي قۇجاتتاردى ساتىپ العاندارعا ەسكەرتۋ جاساعىم كەلەدى، قىلمىستىق كودەكستە جالعان قۇجاتتاردى پايدالانۋدى رەتتەيتىن جەكە باپ بار.
ەگەر ادام ونى ساتىپ الىپ، جالعان ەكەنىن بىلە تۇرا، جۇمىسقا ورنالاسۋعا جانە رەسمي قۇجات رەتىندە ۇسىنۋعا تىرىسسا، 40 كۇنگە قامالادى نەمەسە 600 ساعاتقا دەيىن قوعامدىق جۇمىستارعا تارتىلادى"، - دەدى ساياسات نۇربەك.
ونىڭ سوزىنشە، ءقازىر ىشكى ىستەر مينيسترلىگىمەن جۇمىس جۇرگىزىلىپ جاتىر.
"ءبىز وسى دەرەكتەردىڭ بارلىعىن تەكسەرۋ ءۇشىن ىىم-گە حات جولدادىق. ينتەرنەت پلاتفورمالار، حابارلاندىرۋلار ارقىلى جالعان قۇجاتتاردى ساتاتىن ادامدار بويىنشا جەكە جۇمىس جوسپارى بولادى"، - دەدى ۆەدومستۆو باسشىسى.
مينيستر جالعان ديپلومدى قازىرگى ديپلومنان قالاي اجىراتۋعا بولاتىنىن دا ءتۇسىندىردى. ءاربىر قۇجاتتا بىرەگەي جسن جانە QR-كود بولادى. بۇل ارقىلى دەرەكتى جوعارى ءبىلىم بەرۋدى دامىتۋ ۇلتتىق ورتالىعىنىڭ پورتالىنا ەنگىزۋگە جانە ديپلومنىڭ سول جەردە تىركەلگەنىن نەمەسە تىركەلمەگەنىن تەكسەرۋگە بولادى.
