قالا ەكونوميكاسىندا ونەركاسىپتىڭ، قۇرىلىستىڭ، الەۋمەتتىك ەكونوميكا مەن جاڭا يندۋستريانىڭ ۇلەسى ماردىمسىز. قالا ەكونوميكاسىنىڭ 33%-ىن قۇرايتىن ساۋدا سول كۇيىندە قالۋدا، ال بۇل قالانىڭ جەدەل قارقىنمەن دامۋىنا مۇمكىندىك بەرمەيدى.
– سوندىقتان ءبىز قالا ەكونوميكاسىن قۇرىلىمدىق رەفورمالاۋعا بەت الدىق. جاڭا ەكونوميكا سەكتورلارى باستى نازاردا. ساۋدا ۇلەسىن بىرتىندەپ ازايتىپ، جوعارى بىلىكتىلىكتى قاجەت ەتەتىن وندىرىستىك سالالاردىڭ دامۋىن كۇشەيتۋ قاجەت، ولار – كاسىبي جانە عىلىمي-تەحنيكالىق قىزمەتتەر، قارجى جانە ساقتاندىرۋ، اقپاراتتىق-كوممۋنيكاسيالىق تەحنولوگيالار، سونداي-اق كرەاتيۆتى ەكونوميكا سالالارى، – دەدى ب. ساعىنتايەۆ.
سونداي-اق، جاڭا جىبەك جولىنىڭ ترانزيتتىك دالىزىندەگى قولايلى گەوگرافيالىق جاعدايدى پايدالانىپ، ءىرى ايماقتىق كولىك-لوگيستيكالىق حاب رەتىندە حالىقارالىق جەتكىزۋ جانە تاراتۋ تىزبەكتەرىنە ەنۋ قاجەت.
الماتى قازاقستانداعى ەڭ ءىرى تۇتىنۋشى نارىعى جانە ەلدەگى كوتەرمە جانە بولشەك ساۋدانىڭ ەڭ كوپ ۇلەسىن الاتىندىقتان، لوگيستيكالىق الەۋەتتى دامىتۋعا دا باسا نازار اۋدارىلاتىن بولادى.
حالىقارالىق اۋەجايدى كەڭەيتۋدىڭ قالا ءۇشىن ماڭىزى زور. جاقىن ارادا حالىقارالىق اۋەجايدىڭ جاڭا تەرمينالىنىڭ قۇرىلىسىن باستاۋ جوسپارلانۋدا. تەرمينالدى ىسكە قوسقان كەزدە جولاۋشىلار اعىنىن جىلىنا 6 ملن ادامعا كوبەيتۋ جوسپارلانۋدا، ال وتكىزۋ قابىلەتى 2،5 ەسەگە ارتاتىن بولادى.
