الماتىدا 5،5 جىلعا سوتتالعان ادۆوكات قايرات جۇماعالييەۆكە قاتىستى ىستە ءماجىلىستىڭ ەكس-توراعاسى نۇرلان نىعماتۋلين مەن نازاربايەۆتىڭ نەمەرە ءىنىسى قايرات ساتىبالدىنىڭ اتى اتالدى، - دەپ حابارلايدى Dalanews.kz Nege.kz-كە سىلتەپ.
ادۆوكات قايسار جۇماعالييەۆ الاياقتىق جاساعانى ءۇشىن ءىستى بولعان ەدى.
"ءىس ماتەريالدارىنا سايكەس، قايسار جۇماعالييەۆ 2016 جىلى 300 مىڭ دوللارعا بالقاشتىق كاسىپكەر قۋات سۇلتانبەكوۆتى كولونيادان بوساتىپ بەرەمىن دەپ ۋادە بەرگەن. كاسىپكەردىڭ تۋىستارى "بۇل زاڭسىز ارەكەتتىڭ" ارتىندا اعايىندى نىعماتۋليندەر تۇرعانىن ەسكەرتكەن. سول كەزدە جۇماعالييەۆ قايرات ساتىبالدىمەن دوس بولعاندىقتان، بۇل ماسەلەنى شەشىپ بەرە الاتىنىن ايتقان"، - دەلىنگەن حابارلامادا.
ادۆوكات بالقاشتىق كاسىپكەردى اۋەلى شقو-داعى كولونيادان الماتى وبلىسىنا اۋىستىرىپ بەرەتىنىن، ارتىنشا قىلمىستىق ءىستى توقتاتۋعا كومەكتەسەتىنىن ايتقان.
"اقشا 150 مىڭ دوللاردان ەكى ترانشپەن الىنۋى كەرەك بولعان. ادۆوكات اقشانىڭ جارتىسىن 2016 جىلدىڭ قازانىندا العان. ال جوعارعى سوت كاسىپكەردى 2023 جىلى، ياعني ادۆوكات اقشانى العاننان كەيىن جەتى جىلدان سوڭ اقتاعان. ناتيجەسىندە جۇماعالييەۆتىڭ ءوزى سوتتالىپ، بەس جىل التى ايعا باس بوستاندىعىنان ايىرىلعان"، - دەلىنگەن حابارلامادا.
ەسكە سالايىق، 2022 جىلى ناۋرىزدا ساتىبالدى ۇلى شەتەلگە قاشىپ بارا جاتقان جەرىنەن ۇستالعان بولاتىن.
ال قىركۇيەكتە استانادا سوتى قايرات ساتىبالدىۇلىن التى جىلعا باس بوستاندىعىنان ايىرۋعا ۇكىم شىعاردى، ونىڭ مۇلكى تاركىلەندى جانە 10 جىل بويى مەملەكەتتىك قىزمەتتە جۇمىس ىستەۋگە تىيىم سالىندى. سوت بارىسىندا ساتىبالدى ۇلى "قازاقتەلەكوم" جانە "كولىك سەرۆيس ورتالىعى" كومپانيالارىنا زالالدى وتەۋ رەتىندە ونداعان ميلليارد تەڭگە تولەگەنى مالىمدەلدى. تاراپتار مەدياتيۆتىك كەلىسىم جاساستى.
2023 جىلى جەلتوقساندا قايرات ساتىبالدى ۇلى 55 ميلليارد تەڭگەدەن اسا اقشانى مەملەكەتكە قايتارعان بولاتىن. انتيكور قايرات ساتىبالدىۇلىنا جانە باسقا دا ادامدارعا قاتىستى جۇرگىزىلىپ جاتقان تەرگەۋ شەڭبەرىندە ەلدەن زاڭسىز شىعارىلعان اكتيۆتەردى، ونىڭ ىشىندە قىلمىستىق جولمەن الىنعان اقشانى جانە وزگە دە مۇلىكتى قايتارىپ جاتقانىن حابارلاعان بولاتىن.
