تۇركىستان وبلىسىنىڭ سارىاعاش قالاسىندا ۇقك شەكارا قىزمەتىنىڭ سارىاعاش اۋدانى بويىنشا شەكارا باسقارماسىنىڭ 25-جىلدىق مەرەكەسىنە ارنالعان سالتاناتتى ءىس-شارا ءوتتى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

سارىاعاش اۋدانى بويىنشا شەكارا باسقارماسىنىڭ ساپتىق الاڭىندا وتكەن ءىس-شاراعا ۇقك شەكارا قىزمەتى ديرەكتورىنىڭ ورىنباسارى پولكوۆنيك سەرىك راحيموۆ، ۇقك شەكارا قىزمەتىنىڭ تۇركىستان وبلىسى بويىنشا دەپارتامەنتىنىڭ باستىعى پولكوۆنيك ماديار ءجۇمادىلوۆ قاتىستى.

ونىڭ ىشىندە سارىاعاش شەكارا وتريادىنىڭ بۇرىنعى كومانديرلەرى  پولكوۆنيكتەر اباي برەكەشوۆ، ساپار بايمەنوۆتەر مەن ۇقك شەكارا قىزمەتىنىڭ زەينەتكەرلەرى بولدى.

بويلارىندا پاتريوتتىق رۋحتارى بار وسكەلەڭ ۇرپاق باردا باتىرلارىمىزدىڭ اتى وشپەيتىنى انىق. وتان ءۇشىن وتقا تۇسۋگە ءارقاشاندا دايىن تۇراتىن شەكاراشىلاردىڭ پاتريوتتى، وتانسۇيگىشتىڭ رۋحى جاستارعا ۇلگى بولارى ءسوزسىز.

ءىس-شارا بارىسىندا تۇركىستان وبلىسى اكىمى مەن ۇقك ءتوراعاسىنىڭ ورىنباسارى – شەكارا قىزمەتى ديرەكتورى جانە ۇقك شەكارا قىزمەتىنىڭ تۇركىستان وبلىسى بويىنشا دەپارتامەنتى باستىعىنىڭ بۇيرىقتارى نەگىزىندە قىزمەتتە جوعارى جەتىستىكتەرگە جەتكەن اسكەري قىزمەتكەرلەر ماراپاتالدى.

بۇدان سوڭ سارىاعاش اۋدانى بويىنشا شەكارا باسقارماسىنىڭ 25-جىلدىعىنا ارنالعان شاعىن كونسەرت قويىلىپ، كەلگەن قوناقتار شەكارا باسقارماسىنىڭ تىنىس-تىرشىلىگى، زاماناۋي ۇلگىدەگى قارۋ-جاراق، كيىم-ۇلگىلەرى ۇسىنىلعان كورمەمەن تانىستى.

سارىاعاش اۋدانى بويىنشا شەكارا باسقارماسىنىڭ تاريحىندا 1999 جىلدىڭ 15-قىركۇيەگى ايرىقشا كۇن بولىپ ەسەپتەلەدى. وسى كۇنى شەكارا باسقارماسىندا مملەكەتتىك شەكارانى قورعاۋعا  ارنالعان  العاشقى سالتاناتتى ميتينگ وتكىزىلگەن بولاتىن.