سالالىق جۋرناليستيكانى دامىتۋ ماڭىزدى دۇنيە ەكەنىنە پاندەميا كەزىندە كوزىمىز انىق جەتتى. ەلىمىزدە مەديسينا تاقىرىبى بويىنشا ىندەتىپ جازاتىن جۋرناليستەردىڭ تىم از ەكەنىنە كوزىمىز جەتتى.
ءقازىر قازاقستاندا ەكونوميكا، ساياسات، سپورت، مادەنيەت تاقىرىبىندا قالام تەربەيتىن جۋرناليستەر بارشىلىق. ال بۇدان وزگە تاقىرىپتار بەلدەن قازىپ جازىپ جۇرگەن جۋرناليستەر جوقتىڭ قاسى.
ىرگەمىزدەگى كورشى رەسەيدىڭ اقپاراتتىق كەڭىستىگىنە كوز سالساڭىز، سالالىق جۋرناليستيكانى ايتپاعان كۇننىڭ وزىندە ناقتى ءبىر سالالارعا ارنالعان گازەت-جۋرنالدار، سايتتار مەن تەلەارنالار جۇمىس ىستەيتىنىن كورۋگە بولادى. كورشىمىز اسكەري قۋاتتى ەل بولعاندىقتان، بۇل ەلدە تازا اسكەري باعىتتا حابار تاراتاتىن تەلەارنا بار. بۇدان باسقا، عىلىمي-تەحنيكالىق جاڭالىقتار بويىنشا جان-جاقتى اقپارات تاراتاتىن تەلەارنالارى دا جۇمىس ىستەيدى.
الداعى ۋاقىتتا بىزدە تۇتاستاي تەلەارنا قۇرماساق تا مەديسينا، عىلىم سالاسىن ىندەتىپ جازاتىن جۋرناليستەر شوعىرىن قالىپتاستىرۋعا بولادى. ارينە، بۇل رەتتە تورت-بەس جۋرناليستكە بولا تۇتاستاي تەلەارنا اشۋدىڭ قاجەتى جوق. ءوز تاقىرىبىنا ادالدىق تانىتىپ جۇرگەن جۋرناليستەر يۋتۋبتان ارنايى كانالدار اشىپ، جان-جاقتى جۇمىس ىستەسە، سالالىق جۋرناليستيكا بىرتىندەپ بولسا دا داميتىنى بەلگىلى.
وسى رەتتە يۋتۋب كانال اشىپ، سالالىق جۋرناليستيكانى دامىتۋعا ۇلەس قوسىپ جۇرگەن ارىپتەستەرىمىزدى ق ر اقپارات جانە قوعامدىق دامۋ مينيسترلىگى قولداۋ جۇمىستارىن قولعا الۋى كەرەك دەپ ەسەپتەيمىز. اقپارات مينيسترلىگى سالالىق جۋرناليستيكانى دامىتۋعا ۇدايى كوڭىل ءبولىپ كەلەدى. مۇنى مەملەكەتتىك تاپسىرىس كەزىندەگى تاقىرىپتاردان انىق بايقاۋعا بولادى.
قالىپتاسقان زاڭدىلىق بويىنشا مينيسترلىك گازەت-جۋرنالدار مەن سايتتارعا، تەلەراديوعا مەملەكەتتىك تاپسىرىستى ۇسىنعاندا بارلىق تاقىرىپتى قامتيدى. وكىنىشكە وراي، رەداكسيالار قانداي دا ءبىر تاقىرىپ بويىنشا مەملەكەتتىك تاپسىرىسقا قول جەتكىزگەننەن كەيىن سول تاقىرىپ بويىنشا ماقالالاردى توپىرلاتىپ جازىپ، تاپسىرىستى ورىنداۋعا تىرىسادى. بۇدان سالالىق جۋرناليستيكا دامىپ كەتپەيتىنى بەلگىلى.
سوندىقتان مەملەكەتتىك تاپسىرىستى بەرگەن كەزدە جۋرناليستيكامەن اينالىسىپ جۇرگەن جۋرناليستەرگە بەرۋدىڭ امالىن قاراستىرۋ كەرەك. سول كەزدە ءبىر سالانىڭ سوڭىندا جۇرگەن جۋرناليستەر ءوز تاقىرىبىن ىندەتىپ جازىپ، سالالىق جۋرناليستيكانىڭ كوسەگەسىن كوگەرتۋى مۇمكىن. وسىلايشا، ەلىمىزدەگى سالالىق جۋرناليستيكانى دامىتۋعا بولادى.
نۇرلان جۇماقانوۆ
