بۇگىن «نۇرلى جەر» مەملەكەتتىك باعدارلاماسى اياسىندا 29 جاسقا دەيىنگى جۇمىس ىستەيتىن جاستارعا 5 جىل مەرزىمگە 1050 جالدامالى پاتەر بەرىلەدى. تاعى 441 پاتەر «باقىتتى وتباسى» جانە «شاڭىراق» باعدارلامالارى بويىنشا كوپبالالى، تولىق ەمەس جانە مۇگەدەك بالالاردى تاربيەلەپ وتىرعان وتباسىلار اراسىندا جەڭىلدىكپەن كرەديت بەرۋ شارتىمەن بولىنگەن.
پاتەرلەر ناۋرىزباي اۋدانىنداعى «الما سيتي 5» تك جانە الاتاۋ اۋدانىنداعى «مادەنيەت» تك-دە «نۇرلى جەر» باعدارلاماسى بويىنشا سالىنعان ۇيلەردە ورنالاسقان.
الماتى اكىمى باقىتجان ساعىنتايەۆ جۇمىس ىستەيتىن جاستاردى قولداۋ 2019 جىلدان باستاپ «نۇرلى جەر» جالعا بەرىلەتىن تۇرعىن ءۇي باعدارلاماسىنىڭ تۇڭعىش پرەزيدەنت – ەلباسى ن. نازاربايەۆتىڭ تاپسىرماسى بويىنشا جۇزەگە اسىرىلىپ جاتقانىن اتاپ ءوتتى.
– قالانىڭ دامۋىنا ءوز ۇلەسىن قوساتىن جاستاردى قولداۋ – ءبىزدىڭ باستى مىندەتىمىز. مەملەكەتتىك جانە قالالىق باعدارلامالاردىڭ ارقاسىندا مىڭداعان قالا تۇرعىندارى قولجەتىمدى باسپاناعا يە بولادى، – دەپ اتاپ ءوتتى باقىتجان ساعىنتايەۆ جاڭا قونىس يەلەرىن ەل تاۋەلسىزدىگىنىڭ 30 جىلدىعىمەن جانە كەلە جاتقان جاڭا جىلمەن قۇتتىقتادى.
سونىمەن قاتار، «الماتى جاستارى» قالالىق باعدارلاماسى بويىنشا ەكىنشى جىل قاتارىنان تۇرعىن ءۇي ساتىپ الۋ ءۇشىن مىڭداعان جەڭىلدىكتى قارىزدار بولىنۋدە. پايىزدىق مولشەرلەمە – 5%، نەسيە مەرزىمى – 25 جىل. بيىل قارىز سوماسى 18 ملن تەڭگەگە دەيىن ءوستى.
ەسكە سالساق، تاۋەلسىزدىك كۇنى قارساڭىندا قالانىڭ كوممۋنالدىق تۇرعىن ءۇي قورىنان كەزەكتە تۇرعان حالىقتىڭ الەۋمەتتىك وسال توپتارىنا 211 پاتەر ءبولىندى. تۇرعىن ءۇي «نۇرلى جەر» مەملەكەتتىك باعدارلاماسى اياسىندا سالىنعان الاتاۋ اۋدانىنداعى «مادەنيەت» تك ورنالاسقان.
جالپى، الدىن الا ەسەپتەۋلەر بويىنشا، وتكەن جىلى الماتىنىڭ 5 400 تۇرعىنى باسپانالى بولادى. جىل باسىنان بەرى 3 903 ادام تۇرعىن ۇيمەن قامتاماسىز ەتىلدى. ونىڭ ىشىندە، «باقىتتى وتباسى» رەسپۋبليكالىق باعدارلاماسى بويىنشا (2-10-20) 441 نەسيەلىك قارىز، «شاڭىراق» رەسپۋبليكالىق باعدارلاماسى بويىنشا (5-10-20) 2 146 نەسيەلىك قارىز بەرىلدى. «الماتى جاستارى» قالالىق جەڭىلدىكپەن نەسيەلەندىرۋ باعدارلاماسى بويىنشا بۇگىندە 973 نەسيە بەرىلدى. كوممۋنالدىق تۇرعىن ءۇي قورىنان 343 پاتەر ءبولىندى.
