مەملەكەت باسشىسىنىڭ تاپسىرماسىمەن جاڭا وقۋ جىلىندا ەلىمىزدە «جايلى مەكتەپ» اۋقىمدى ۇلتتىق جوباسى اياسىندا سالىنعان العاشقى مەكتەپتەر اشىلدى.
پرەمەر-مينيستردىڭ ءبىرىنشى ورىنباسارى رومان سكليار استانا قالاسىنداعى №99 مەكتەپتىڭ اشىلۋ سالتاتاناتىنا قاتىستى.
العاشقى قوڭىراۋ سالتاناتىندا ءسوز سويلەگەن ۆيسە-پرەمەر وقۋشىلاردى ءبىلىم كۇنىمەن قۇتتىقتادى.
«بارشاڭىزدى بۇگىنگى ەرەكشە مەرەكە – ءبىلىم كۇنىمەن شىن جۇرەكتەن قۇتتىقتايمىن! مەكتەپ بۇل ءبىلىم ورداسى، وسى جەردە سىزدەرگە ساپالى ءبىلىم جانە سانالى تاربيە الۋ ءۇشىن بارلىق قولايلى جاعداي جاسالىپ وتىر. مەكتەپتە ساۋلەتىنە ساي ساپالى تاربيە مەن ءبىلىم بەرىلەدى دەپ سەنەمىز. ول ءۇشىن مەكتەپ باسشىلارى مەن پەداگوگتەر ۇجىمى بارلىق كۇش-جىگەرىن جۇمسايتىنى انىق»، — دەپ اتاپ ءوتتى پرەمەر-مينيستردىڭ ءبىرىنشى ورىنباسارى.
ەستەرىڭىزگە سالا كەتەيىك، «جايلى مەكتەپ» ۇلتتىق جوباسى مەملەكەت باسشىسىنىڭ باستاماسىمەن جۇزەگە اسىرىلىپ وتىر. وقۋشى ورنى تاپشىلىعى ماسەلەسىن شەشۋگە جانە قالا مەن اۋىل مەكتەپتەرى اراسىنداعى الشاقتىقتى ازايتۋعا باعىتتالعان جوبادا فۋنكسيونالدى جانە ءقاۋىپسىز ءبىلىم بەرۋ ورتاسىن قۇرۋعا ەرەكشە نازار اۋدارىلادى. باستاۋىش جانە جوعارعى سىنىپ وقۋشىلارى ءۇشىن بولەك بلوكتار قاراستىرىلعان.
سونداي-اق تەحنيكالىق قۇرالدار ەنگىزۋ ارقىلى قاۋىپسىزدىك شارالارىن ارتتىرۋ، ەرەكشە ءبىلىم بەرۋدى قاجەت ەتەتىن بالالار ءۇشىن كەدەرگىسىز ورتا قالىپتاستىرۋ، مەكتەپتى زاماناۋي پاندىك كابينەتتەرمەن جابدىقتاۋ تالاپ ەتىلەدى.
