پرەمەر-مينيستردىڭ ءبىرىنشى ورىنباسارى رومان سكلياردىڭ توراعالىعىمەن ىشكى نارىقتى مۇناي ونىمدەرىمەن قامتاماسىز ەتۋ، وتىندى زاڭسىز اكەتۋدىڭ جولىن كەسۋ جانە جانار-جاعارماي ماتەريالدارىنىڭ اينالىمىن سيفرلاندىرۋ ماسەلەلەرى بويىنشا كەڭەس ءوتتى، دەپ حابارلايدى Dalanews.kz.

ەنەرگەتيكا مينيسترلىگىنىڭ اقپاراتى بويىنشا، ججم نارىعىنداعى جاعداي تۇراقتى، ءىرى مۇناي-وڭدەۋ زاۋىتتارى شتاتتىق رەجيمدە جۇمىس ىستەيدى، قورلار ىشكى سۇرانىستى قامتاماسىز ەتۋگە مۇمكىندىك بەرەدى.

سونداي-اق ەلدەن مۇناي ونىمدەرىن زاڭسىز اكەتۋدىڭ جولىن كەسۋ جۇمىستارى جالعاسۋدا. جىل باسىنان بەرى كەدەن ورگاندارى مەن شەكارا قىزمەتى زاڭسىز اكەتۋگە 836 ارەكەتتىڭ جولىن كەستى.

سونىمەن قاتار قارجى مونيتورينگى اگەنتتىگى مۇناي ونىمدەرىن كونتراباندامەن جانە جالعان وڭدەۋمەن اينالىساتىن ءبىرقاتار ۇيىمداسقان توپتار مەن كومپانيالاردىڭ قىزمەتىن انىقتاپ، جولىن كەستى، بۇل ىستەر بويىنشا جۇمىستار جالعاسۋدا. بيىل اگەنتتىكتىڭ وندىرىسىندە 22 قىلمىستىق ءىس بولدى، وندا ججم زاڭسىز اينالىمىنىڭ سوماسى 19 ملرد تەڭگەنى قۇرادى. شەكارانىڭ نەگىزگى ۋچاسكەلەرىندە ءموبيلدى توپتار جۇمىس ىستەۋدە، رەيدتىك جانە جەدەل ءىس-شارالار وتكىزىلۋدە.

جىل باسىنان باستاپ ىشكى ىستەر مينيسترلىگى ءتيىستى رۇقساتسىز قايتا جابدىقتالعان كولىك قۇرالىن باسقارعانى ءۇشىن 3 334 جۇرگىزۋشىنى (اقبتك 590 بابىنىڭ 7 جانە 10 تارماقتارى)، ونىڭ ىشىندە بەنزين باكتارىن بەنزينگە-293، ديزەل وتىنىنا-108 جانە گاز باللوندى جابدىققا-2 933 قايتا جابدىقتاعانى ءۇشىن تارتتى.

ۇيىمداسقان قىلمىسقا قارسى كۇرەس بولىمشەلەرى مۇناي ونىمدەرىن زاڭسىز اكەتۋمەن اينالىساتىن قىلمىستىق توپتاردىڭ قىزمەتىن انىقتاۋ جانە جولىن كەسۋ بويىنشا جۇمىستى جالعاستىرۋدا. جىل باسىنان بەرى مۇناي ونىمدەرىن ۇرلاۋ، زاڭسىز ساقتاۋ جانە تاسىمالداۋ فاكتىلەرى بويىنشا 11 قىلمىستىق قۇقىق بۇزۋشىلىق انىقتالدى.

شەتەلگە وتىن اعىنىن ازايتۋ ماقساتىندا مۇناي ونىمدەرىنىڭ جەكەلەگەن تۇرلەرىن اكەتۋگە تىيىم سالۋ ۇزارتىلدى، كولىك قۇرالدارىمەن شەكارادان ءوتۋ بويىنشا شەكتەۋلەر ەنگىزىلدى، شەكارالىق پۋنكتتەردە باقىلاۋ كۇشەيتىلدى.

وڭىرلەردە اكىمدەر ورىنباسارلارىنىڭ باسشىلىعىمەن مۇناي بازالارى مەن جانارماي قۇيۋ بەكەتتەرىندە وتىننىڭ بولۋىن جانە لوگيستيكانىڭ تۇراقتىلىعىن باقىلايتىن شتابتار جۇمىس ىستەيدى.

كەڭەستە مۇناي بازالارىن مۇناي ونىمدەرىنىڭ اينالىمىن ەسەپكە الۋ جانە سيفرلاندىرۋ باقىلاۋ قۇرالدارىمەن جاراقتاندىرۋعا ەرەكشە نازار اۋدارىلدى. مۇناي بازالارىنىڭ ءبىر بولىگى قازىرگى زامانعى ەسەپكە الۋ جۇيەلەرىمەن جابدىقتالعان جانە ناقتى ۋاقىت رەجيمىندە دەرەكتەردى بەرەدى، مۇنداي قۇرىلعىلاردى ورناتۋ مىندەتتىلىگى مەن ولاردىڭ جوقتىعى ءۇشىن جاۋاپكەرشىلىكتى بەكىتەتىن زاڭنامالىق تۇزەتۋلەر دايىندالدى. سونىمەن قاتار مەملەكەتتىك جانە كورپوراتيۆتىك اقپاراتتىق جۇيەلەردىڭ ينتەگراسياسى جۇرگىزىلۋدە، بۇل موز-دەن تۇپكىلىكتى ىسكە اسىرۋعا دەيىنگى وتىن قوزعالىسىنىڭ اشىقتىعىن قامتاماسىز ەتۋگە مۇمكىندىك بەرەدى.

رومان سكليار بارلىق شارالار قازاقستان حالقى مەن ەكونوميكاسىنىڭ قاجەتتىلىكتەرىن باسىم قامتاماسىز ەتۋگە باعىتتالعانىن اتاپ ءوتتى. ۇكىمەت قۇقىق قورعاۋ جانە باقىلاۋشى ورگاندارمەن بىرلەسىپ ججم نارىعىن باقىلاۋدى قاتاڭداتۋدى، زاڭسىز اكەتۋدىڭ جولىن كەسۋدى جانە وتىننىڭ ىشكى نارىققا ۇزدىكسىز جەتكىزىلۋىن قامتاماسىز ەتۋدى جالعاستىرادى.