استانانىڭ حالىقارالىق اۋەجايىنىڭ ترانزيتتىك ايماعىن رەسەي ازاماتى، بۇرىنعى اسكەري قىزمەتشى بىرنەشە كۇننەن بەرى پانالاپ ءجۇر. بۇل تۋرالى قازاقستاندىق حالىقارالىق ادام قۇقىقتارى بيۋروسى مالىمدەدى، دەپ حابارلايدى Dalanews.kz.
ۇيىمنىڭ مالىمەتىنشە، 1990 جىلى تۋعان ازامات سوعىس ءجۇرىپ جاتقان كورشىلەس ەلدىڭ اسكەرىنەن قاشىپ كەتكەن. ول 28 جەلتوقساننان بەرى اۋەجايدا ءجۇر.
شەكارا قىزمەتى ونى قازاقستان اۋماعىنا وتكىزبەدى. ال رەسەيلىك ازامات قازاقستاننان بوسقىن مارتەبەسىن بەرۋدى سۇرايدى.
ول ەلىنە قايتا ورالسا، قىلمىستىق قۋدالاۋعا ۇشىراپ، اسكەري قىزمەتتەن باس تارتقانى ءۇشىن قىسىم كورىپ، جازالانۋى مۇمكىن.
قۇقىق قورعاۋشىلار قازاقستان بوسقىندار تۋرالى 1951 جىلعى كونۆەنسياعا قاتىسۋشى مەملەكەت ەكەنىن ەسكە سالدى.
سوندىقتان بيۋرو:
- شەكارا قىزمەتىنە،
- باس كولىك پروكۋراتۋراسىنا،
- ەڭبەك جانە حالىقتى الەۋمەتتىك قورعاۋ مينيسترلىگىنە
ءوتىنىش جولداعان. ولار رەسەيلىك ازاماتتىڭ بوسقىن مارتەبەسىن بەرۋ تۋرالى ءوتىنىشىن تىركەپ، زاڭعا جانە حالىقارالىق تالاپتارعا ساي راسىمنەن وتۋىنە مۇمكىندىك بەرۋدى سۇراپ وتىر.
