سۋ تاسقىنىنا قاتىستى توتەنشە جاعداي تەك قازاقستاندى ەمەس، كورشىلەس رەسەيدە دە كۇردەلى بولىپ وتىر. رەسەي فەدەراسياسىنىڭ بىرنەشە وبلىسىندا ايماقتىق دارەجەدەگى توتەنشە جاعداي جاريالانعان.

رەسەي فەدەراسياسى پرەزيدەنتىنىڭ ورال فەدەرالدى وكرۋگىندەگى وكىلى ۆلاديمير ياكۋشيەۆ وڭىردەگى قازىرگى جاعداي تۋرالى ايتىپ، بۇل جايتقا قازاقستاننىڭ قانداي اسەرى بارىن تىلگە تيەك ەتتى، - دەپ حابارلايدى Dalanews.kz.

ۆلاديمير ياكۋشيەۆتىڭ ايتۋىنشا، جاعداي كۇردەلى، جۇمىس ىستەلىپ، اۋماقتار تەكسەرىلىپ جاتىر. اسىرەسە، سۋ كەلىپ جاتقان ايماقتاردا بەلسەندى جۇمىستار قولعا الىنعان. ال كەيبىر اۋماقتاردا ەۆاكۋاسيا جۇمىستارى جۇرگىزىلىپ جاتىر. سونىمەن قاتار، رەسمي وكىل رەسەي قورعان جانە تۇمەن وبلىستارىنداعى سۋ تاسقىنىنىڭ الدىن الۋ ءۇشىن قازاقستان ءوزىنىڭ سۋ قويمالارىندا سۋدى "كەلىسىلگەن تۇردە جىبەرۋى كەرەك" دەگەن پىكىردە.

"بىزدە وسىنداي قىس بولعان كەزدە، ونىڭ ۇستىنە قار دا جەتكىلىكتى مولشەردە جاۋعان كەزدە، سونىمەن قاتار، سۋ قويماسىندا سۋدىڭ جەتكىلىكتى ۇلكەن قورى جينالعان كەزدە وسى سۋ قويمالارىنا سۋ نەعۇرلىم كەلىسكەن تۇردە، دۇرىس جانە بىركەلكى كەلۋى ءۇشىن ارىپتەستەرىمىزبەن (قازاقستانداعى - ەسك.) جۇمىس ىستەۋ كەرەك"، - دەدى ياكۋشيەۆ ربك تەلەارناسىنىڭ ەفيرىندە.

ونىڭ ايتۋىنشا، وسى ماسەلەلەر شەشىلگەن جاعدايدا بىرنەشە وبلىستا سۋ تاسقىنىنىڭ الدىن الۋعا بولادى. ازىرگە قورعان "ۇلكەن سۋعا" دايىندالىپ جاتىر.

"الدىن الا بولجام بويىنشا بۇل - تاريحي ماكسيمۋم"،- دەدى ول.

ايتا كەتەيىك، قازاقستاننىڭ دا ءبىرقاتار وڭىرىندە سۋ تاسقىنى ماسەلەسى ۋشىعىپ وتىر. رەسمي دەرەكتەردە اتىراۋ وبلىسى قۇلسارى قالاسىندا ءۇش مىڭعا جۋىق ءۇي سۋعا كەتتى دەلىنەدى. ال باتىس قازاقستان وبلىسى جايىق وزەنىنىڭ دەڭگەيى كوتەرىلۋىن قاتاڭ باقىلاپ وتىر.

"سۋ رەسەي فەدەراسياسىنىڭ تاراپىنان كەلەدى، وندا سۋ تاسقىنىنا بايلانىستى يريكلين سۋ قويماسىنا جىبەرىلىپ جاتىر. رف تاراپىنان يريكلين سۋ قويماسىنىڭ سۋىن اعىزۋ بىرتىندەپ ازايىپ كەلەدى. رەسەي تاراپىنىڭ اقپاراتى بويىنشا يريكلا سۋ قويماسىنا اعىن جىلدامدىعى - 1 485 م3/سەك"، - دەدى باتىس قازاقستان وبلىسى تجد باستىعىنىڭ مىندەتىن اتقارۋشى پولكوۆنيك رۋسلان قاسىبايەۆ وكق الاڭىندا وتكەن بريفينگتە بۇعان دەيىن.

سۋ تاسقىنى كەزەڭى باستالعالى وڭىردە بارلىعى 12 970 ادام ەۆاكۋاسيالاندى، ونىڭ ىشىندە 5 400-گە جۋىعى بالا. 1155 تۇرعىن ءۇي سۋ استىندا قالدى، ونىڭ 732-سىنە تۇرعىندار قايتىپ كەلدى.

ال "قازاۆتوجول" ۇك اق وكىلدەرى رەسپۋبليكالىق جولداردا 706 تەحنيكا مەن 1680 ادام سۋ تاسقىنىنىڭ الدىن الۋ بويىنشا جۇمىس ىستەپ جاتقانىن مالىمدەدى.

سونداي-اق، ۋاقىتشا ورنالاستىرۋ پۋنكتتەرىندە 7 مىڭنان اسا ادام بار دەگەن دەرەكتەر دە بار.