رەسەي فينليانديا، ەستونيا جانە ليتۆامەن بالتىق تەڭىزىندەگى شەكاراسىن كەڭەيتۋدى جوسپارلاپ وتىر، - دەپ حابارلايدى Dalanews.kz.

"ازاتتىق" راديوسى مالىمەتىنشە، مۇنداي قۇجاتتى ەلدىڭ قورعانىس مينيسترلىگى دايىنداعان.

"بالتىق، زەلەنوگرادسك جانە فين بۇعازىنىڭ شىعىس بولىگىندە شەكارانى وزگەرتۋ ءتيىستى اكۆاتوريانى رەسەيدىڭ ىشكى تەڭىز سۋى رەتىندە پايدالانۋعا مۇمكىندىك بەرەدى"، - دەپ جازىلعان قۇجاتتا.

"رەسەي سونىمەن بىرگە فين بۇعازىنداعى بىرنەشە ارال اۋماعى مەن نارۆا وزەنىنىڭ سولتۇستىك كىرەبەرىس ءمۇيىسى ماڭىنداعى شەكارا كوورديناتتارىن تۇزەتۋدى كوزدەپ وتىر"، - دەلىنگەن باسىلىم مالىمەتىندە.

ۇكىمەت قاۋلىسىنىڭ قوسىمشاسىنا سۇيەنگەن The Moscow Times باسىلىمى ليتۆامەن شەكارادا كۋرش جانە بالتىق شۇڭقىرى، سونداي-اق، تاران ءمۇيىسى اۋماعى قايتا قارالاتىنىن جازدى.

جوبا اۆتورلارىنىڭ ايتۋىنشا، 1985 جىلى ورناتىلعان گەوگرافيالىق كوورديناتتار "قازىرگى گەوگرافيالىق جاعدايعا تولىق سايكەس كەلە بەرمەيدى".

ورىندار 20-عاسىردىڭ ورتاسىنداعى ەڭبەكتەردەن قۇراستىرىلعان ماسشتابى شاعىن تەڭىز ناۆيگاسيالىق كارتالارى ارقىلى بەلگىلەنگەن، ال بۇل رەسەيدىڭ ىشكى تەڭىز سۋلارىنىڭ سىرتقى شەكاراسىن انىقتاۋعا مۇمكىندىك بەرمەيدى، دەپ جازىلعان قۇجاتتا. زاڭعا سايكەس اۋماق سۋى كەڭەيگەن سايىن ولاردىڭ توبەسىندەگى اۋە كەڭىستىگى دە كەڭەيەدى.

"فينليانديا سىرتقى ىستەر مينيسترلىگى رەسەي بۇۇ-نىڭ تەڭىز قۇقىعى تۋرالى كونۆەنسياسىن باسشىلىققا الادى دەپ ۇمىتتەنەتىنىن جەتكىزدى. ليتۆا سىرتقى ىستەر مينيسترلىگى رەسەيدىڭ شەكارانى وزگەرتۋ جوسپارىن "ناتو مەن ەو-عا قارسى جاعدايدى ۋشىقتىرۋ" دەپ اتاپ، باتىس ەلدەر ماسكەۋگە "قاتاڭ جاۋاپ قايىرۋى كەرەك" دەدى. ەستونيا ازىرگە تۇسىنىكتەمە بەرگەن جوق"، - دەپ جازىلعان باسىلىم مالىمەتىندە.