رەسەيدىڭ سىرتقى ىستەر ءمينيسترى لاۆروۆ استاناعا جۇمىس ساپارىمەن كەلدى. بۇگىن ول ق ر پرەمەر-مينيسترىنىڭ ورىنباسارى، سىرتقى ىستەر ءمينيسترى مۇرات نۇرتىلەۋمەن كەلىسسوزدەر جۇرگىزىپ جاتىر، دەپ حابارلايدى Dalanews.kz.
رەسەي سىرتقى ىستەر ءمينيسترىنىڭ ەكى كۇندىك جۇمىس ساپارى 6-7 قاراشادا وتەدى.
بۇگىنگى كەزدەسۋدە لاۆروۆ رەسەي قازاقستاندا ءبىرىنشى اتوم ەلەكتر ستانسياسىن سالۋ جونىندەگى حالىقارالىق كونسورسيۋمعا قاتىسۋعا دايىن ەكەنىن مالىمدەدى.
"رەسەي كومەكتەسۋمەن عانا شەكتەلمەي، اەس قۇرىلىسىنا قاتىستى ۇسىنىستارىن دا دايىنداپ قويدى. ءبىز قازاقستاندا وتكەن رەفەرەندۋمدى مۇقيات باقىلاپ، پرەزيدەنت توقايەۆتىڭ اتوم ەنەرگەتيكاسىن دامىتۋ جوسپارلارىنا قولداۋ كورسەتتىك. "روساتوم" وسى ماسەلەدە قازاقستاندىق دوستارىمىزبەن بىرلەسىپ جۇمىس ىستەۋگە تولىق دايىن. سونداي-اق باسقا مەملەكەتتەردىڭ ءتيىستى اگەنتتىكتەرىمەن جانە قۇرىلىمدارىمەن ىنتىماقتاسۋعا اشىقپىز"، – دەدى لاۆروۆ.
ايتا كەتەيىك، 2 قىركۇيەكتە قاسىم-جومارت توقايەۆ قازاقستاندا اتوم ەلەكتر ستانسياسىن سالۋ ماسەلەسى بويىنشا رەفەرەندۋم وتكىزۋ تۋرالى جارلىققا قول قويدى.
رەفەرەندۋم بويىنشا داۋىس بەرۋ 6 قازاندا سايلاۋ ۋچاسكەلەرىندە ساعات 07:00-دەن 20:00-گە دەيىن ءوتتى. بۇل رەتتە 80-نەن اسا ۋچاسكە ءوز جۇمىسىن 06:00-دە باستادى. رەسپۋبليكا بويىنشا داۋىس بەرۋگە ارنالعان 10 000-نان اسا ۋچاسكە قۇرىلدى.
شەتەلدە سەۋل مەن توكيودا ۋچاسكەلەر ءبىرىنشى اشىلدى.
اەس سالۋدى داۋىس بەرگەندەردىڭ 71،12 پايىزى قولدادى. رەفەرەندۋمعا داۋىس بەرۋ تىزىمىنە 12،3 ميلليونعا جۋىق قازاقستاندىق ەنگىزىلگەن.
بۇعان دەيىن توقايەۆ شەتەلدىك ينۆەستورلار كەڭەسىنىڭ 36-شى پلەنارلىق وتىرىسىندا قازاقستان اەس قۇرىلىسى ءۇشىن حالىقارالىق كونسورسيۋم قۇرۋ ماسەلەسىن پىسىقتاپ جاتقانىن مالىمدەگەن ەدى.
“ءبىزدىڭ ەلىمىز يادرولىق وتىن سيكلى اياقتالعان دەرلىك الەمدەگى ەڭ ءىرى ۋران ءوندىرۋشى سانالادى. وزدەرىڭىز دە بىلەتىندەي، جاقىندا وتكەن جالپىۇلتتىق رەفەرەندۋمدا قازاقستاندا العاشقى اتوم ەلەكتر ستانسياسىنىڭ قۇرىلىسى ماقۇلداندى. بۇل ءبىزدىڭ ەنەرگەتيكالىق قاۋىپسىزدىگىمىزگە ۇزاق مەرزىمدى ينۆەستيسيا سانالادى. قازىرگى ۋاقىتتا ءبىز وسى جوبا ءۇشىن حالىقارالىق كونسورسيۋم قۇرۋ ماسەلەسىن پىسىقتاپ جاتىرمىز”، — دەدى قاسىم-جومارت توقايەۆ.
قازاقستان ىقتيمال تەحنولوگيا جەتكىزۋشىسى رەتىندە ءتورت كومپانيانى قاراستىرىپ جاتىر. ولار، رەسەيلىك "روساتوم"، قىتايدىڭ CNNC، كورەيانىڭ KHNP جانە فرانسيانىڭ EDF كومپانيالارى.
