ومبى قالاسىنان دۋۆانوۆكا اۋىلىنا دەيىن شامامەن 140 شاقىرىم. سونىڭ ەڭ سوڭعى 17 شاقىرىمىندا اسفالت جوق: بۇل جولمەن بالشىق مۇز بوپ قاتقاندا نەمەسە كەپكەندە عانا جۇرۋگە بولادى. «اۋىلدان 17 شاقىرىمعا دەيىن وركەنيەت اياقتالادى» دەپ ازىلدەيدى جەرگىلىكتى تۇرعىندار. "جول دا، دۇكەن دە، مەكتەپ تە، سۋ دا، ەشتەڭە دە جوق. ءبىز مۇندا تاعدىردىڭ تالكىسىنە تاستاپ كەتتى"، – دەپ شاعىمداندى دۋۆانوۆكا تۇرعىندارى.



بۇل اۋىلدان قازاقستانعا دەيىن بار بولعانى ءبىر جارىم شاقىرىم. "بىزگە نازاربايەۆقا قوسىلا سالعان دۇرىس شىعار؟ بالكىم، سوندا ءومىر تۇزەلەر، ول بىزگە جول سالىپ، جارىق جەتكىزۋگە كومەكتەسەر؟" – دەيدى جەرگىلىكتى بەلسەندى سەرگەي ماليي.

ءدال وسى كىسى اۋىلدى كورشى قازاقستانعا قوسۋ تۋرالى ۇسىنىستى جاقىندا اۋدان ورتالىعىنداعى شەنەۋنىكتەرمەن كەزدەسۋدە ايتقان. شەكارانىڭ ارعى جاعىندا ءومىر قانداي ەكەنىن ول ناقتى بىلمەيدى، ءبىراق "بۇدان ناشار بولۋى مۇمكىن ەمەس" دەپ ەسەپتەيدى.

– جەرگىلىك تۇرعىندار "شىدام تاۋسىلدى" دەپ وتىر. اۋىلدا ەلۋ شاقتى ءۇي بار. بالالار 17 شاقىرىم جەردەگى مەكتەپكە بارادى. پوشتا بىردە ىستەسە، بىردە ىستەمەيدى. شۇعىل جاردەمدى بىرنەشە ساعات كۇتۋگە تۋرا كەلەدى. كەلمەي دە قالۋى مۇمكىن. جاقىندا لەونوۆتاردىڭ سارايى ورتەنىپ كەتتى، ءورت سوندىرۋشىلەر كۇلگە اينالعاندا عانا ارەڭ جەتتى، – دەدى ماليي.

بۇعان قوسا دۋۆانوۆكا تۇرعىندارى اۋىلدا تىم قۇرىعاندا ءبىر دۇكەن ىستەسە نەمەسە كورشى قازاقستانعا ازىق-تۇلىك ءۇشىن رۇقسات بەرسە دەپ سۇرايدى. بۇرىن كورشىلەس رەسەي مەن قازاقستان بىر-بىرىنە قوناققا ەركىن بارىپ تۇراتىن، ءقازىر اۋداندا شەكارا تاستاي قۇلىپتالعان.

اۋىل تۇرعىندارى قازاقستانعا قوسىلۋ يدەياسىن ازىرگە سالماقتى ۇسىنىس رەتىندە قاراستىرىپ وتىرعان جوق، ءبىراق سول ارقىلى بيلىككە تۇرتكى جاساعىسى كەلەدى.

تىم بولماسا، اۋىلعا دەيىن اسفالت توسەپ بەرسە، تۇرعىندارعا قاتىناۋ جەڭىلدەر ەدى. ءبىراق اۋدان مەن وبلىس باسشىلىعى دۋۆانوۆكا ماسەلەلەرىنە ازىرگە نازار اۋدارماي وتىر.

 

دەرەككوزى: sn.kz

 

https://dalanews.kz/35434