ٶزبەكستاندا اي-92 ماركالى بەنزيننٸڭ باعاسى تاريحي رەكورد ورناتتى. ساراپشىلار مۇنى رەسەيدەگٸ جانارماي تاپشىلىعىمەن بايلانىستىرىپ وتىر, دەپ حابارلايدى dalanews.kz.
ٶزبەكستان رەسپۋبليكالىق تاۋار-شيكٸزات بيرجاسىنىڭ مەلٸمەتٸنشە, 29 ماۋسىمدا اي-92 بەنزينٸنٸڭ بٸر تونناسىنىڭ باعاسى 13,919 ملن سۋمعا جەتكەن. بۇل – ەل تاريحىنداعى ەڭ جوعارى كٶرسەتكٸش. ماۋسىم ايىنىڭ باسىنان بەرٸ بەنزيننٸڭ تونناسى شامامەن 1,473 ملن سۋمعا نەمەسە 11,8%-عا قىمباتتاعان.
بەنزين باعاسىنىڭ نەگٸزگٸ ٶسٸمٸ ماۋسىمنىڭ العاشقى جارتىسىندا تٸركەلدٸ. ەگەر 4 ماۋسىمدا بٸر توننا اي-92 بەنزينٸ 12,476 ملن سۋم تۇرسا, اراعا تٶرت كٷن سالىپ ونىڭ باعاسى 10,5%-عا ٶسٸپ, 13,788 ملن سۋمعا جەتكەن. كەيٸنگٸ ەكٸ اپتادا باعا 13,7–13,8 ملن سۋم ارالىعىندا ساقتالىپ, 29 ماۋسىمدا قايتا كٶتەرٸلٸپ, جاڭا تاريحي ماكسيمۋمعا جەتتٸ.
باعانىڭ ٶسۋٸمەن قاتار بيرجاداعى جانارماي كٶلەمٸ دە كٷرت قىسقارعان. 1 ماۋسىمدا ساۋداعا 3 791 توننا بەنزين شىعارىلسا, 23 ماۋسىمعا قاراي بۇل كٶرسەتكٸش ەكٸ ەسەگە جۋىق ازايىپ, 1 898 توننا بولعان. كەيٸن ۇسىنىس كٶلەمٸ 3 123,2 تونناعا دەيٸن قايتا ارتقانىمەن, باعا تٶمەندەمەگەن.
ساراپشىلاردىڭ ايتۋىنشا, باعانىڭ كٷرت ٶسۋٸ رەسەيدەگٸ جانارماي تاپشىلىعىمەن تۇسپا-تۇس كەلدٸ. تاپشىلىققا ۋكراينا دروندارىنىڭ شابۋىلىنان كەيٸن مۇناي ٶڭدەۋ زاۋىتتارىندا جوسپاردان تىس جٶندەۋ جۇمىستارىنىڭ جٷرگٸزٸلۋٸ سەبەپ بولعان. سونىمەن قاتار رەسەيدە 1 سەۋٸردەن باستاپ بەنزين ەكسپورتىنا تولىق تىيىم سالىنعان. الايدا بۇل شەكتەۋ ٷكٸمەتارالىق كەلٸسٸمدەر اياسىندا جٷزەگە اسىرىلاتىن جەتكٸزٸلٸمدەرگە قولدانىلمايدى. سوندىقتان ٶزبەكستانعا جانارماي جەتكٸزۋ بۇرىنعى تەرتٸپپەن جالعاسىپ جاتىر.
