Ózbekstanda AI-92 markaly benzinniń baǵasy tarihi rekord ornatty. Sarapshylar muny Reseidegi janarmai tapshylyǵymen bailanystyryp otyr, dep habarlaidy dalanews.kz.
Ózbekstan respýblikalyq taýar-shikizat birjasynyń málimetinshe, 29 maýsymda AI-92 benzininiń bir tonnasynyń baǵasy 13,919 mln sýmǵa jetken. Bul – el tarihyndaǵy eń joǵary kórsetkish. Maýsym aiynyń basynan beri benzinniń tonnasy shamamen 1,473 mln sýmǵa nemese 11,8%-ǵa qymbattaǵan.
Benzin baǵasynyń negizgi ósimi maýsymnyń alǵashqy jartysynda tirkeldi. Eger 4 maýsymda bir tonna AI-92 benzini 12,476 mln sým tursa, araǵa tórt kún salyp onyń baǵasy 10,5%-ǵa ósip, 13,788 mln sýmǵa jetken. Keiingi eki aptada baǵa 13,7–13,8 mln sým aralyǵynda saqtalyp, 29 maýsymda qaita kóterilip, jańa tarihi maksimýmǵa jetti.
Baǵanyń ósýimen qatar birjadaǵy janarmai kólemi de kúrt qysqarǵan. 1 maýsymda saýdaǵa 3 791 tonna benzin shyǵarylsa, 23 maýsymǵa qarai bul kórsetkish eki esege jýyq azaiyp, 1 898 tonna bolǵan. Keiin usynys kólemi 3 123,2 tonnaǵa deiin qaita artqanymen, baǵa tómendemegen.
Sarapshylardyń aitýynsha, baǵanyń kúrt ósýi Reseidegi janarmai tapshylyǵymen tuspa-tus keldi. Tapshylyqqa Ýkraina drondarynyń shabýylynan keiin munai óńdeý zaýyttarynda jospardan tys jóndeý jumystarynyń júrgizilýi sebep bolǵan. Sonymen qatar Reseide 1 sáýirden bastap benzin eksportyna tolyq tyiym salynǵan. Alaida bul shekteý úkimetaralyq kelisimder aiasynda júzege asyrylatyn jetkizilimderge qoldanylmaidy. Sondyqtan Ózbekstanǵa janarmai jetkizý burynǵy tártippen jalǵasyp jatyr.
