قازاقستاندىق ونەرتاپقىش التاي اينابەك الماتىنى تازارتۋعا ارنالعان جوباسىنىڭ مەرزىمىن اتادى، - دەپ حابارلايدى Dalanews.kz.
"بيىل تۇركىستاندا بيداي 20-25 سەنتنەردەن رەكوردتىق ءونىم بەردى. سوڭعى جىلدارى وسىمدىكتەردى اۋرۋ ەتىپ قىرىپ بارا جاتقان قۇرعاعان ارالدان تاراعان تۇزدى ۋى بۇرىنعىداي جايىلماي، اعاشتار قايتا ءتىرىلدى، كوكونىستەرىمىزگە ءدارىنى از بەرسەك تە ءونىم مول بولدى، دەپ ىرزالىعىن ايتىپ "شاپاندارىن" جاپتى"، - دەدى ول الەۋمەتتىك جەلىدە.
"ەندى الماتىنىڭ اۋاسىن تازارتۋ ريەۆوليۋسيالىق جوبامىزدىڭ ءساتتى شىعۋىنا شىر-پىر بولىپ ءجۇرمىز. وسى جىلدىڭ 20.11 نەن 15.04.2025 دەيىن ميلليونداعان ادامنىڭ كوزىنشە الماتى قالاسىنىڭ اۋاسىنىڭ تازالىقتى قامتاماسىز ەتىپ وتىرۋ كەرەك"، - دەدى ول.
ايتا كەتەيىك، بۇعان دەيىن دە ارالعا قولدان جاڭبىر جاۋعىزىپ، "Rainman" اتانعان قازاقستاندىق عالىم التاي اينابەك الداعى ۋاقىتتا الماتىنىڭ كوك تۇتىنىمەن كۇرەسەتىنىن مالىمدەدى. بۇگىندە ءىرى مەگاپوليستە نارەستەگە دەيىن تەمەكى شەگىپ جاتىر دەپ دابىل قاققان مامان Dalanews.kz اگەنتتىگىنە جاڭا جوباسىن تانىستىردى.
سونىمەن قاتار، جوبانى اياقتان تۇرعىزۋ ءۇشىن عالىم قايىرىمدىلىق قورى اشىلعانىن قۇلاققاعىس ەتتى.
“جوبانى ىسكە اسىرۋ ءۇشىن كاسىپكەرلەردەن دەمەۋشىلىك ەتۋىن سۇراپ، حاتتار دايىنداپ وتىرمىز. وسى ماقساتتا ارنايى “Altay Rain Man foundation” قورىن اشتىق. وسى قور ارقىلى جوبانى ىسكە اسىرامىز دەپ جوسپارلاپ وتىرمىز. جەتى ايعا سوزىلاتىن جوبادا ۋنيۆەرسيتەتتەردىڭ بىرەۋىمەن كوللابوراسيا جاساپ، سول جەردە تەحنولوگيانىڭ عىلىمي زەرتتەۋ قۇرالدارىن بىرگە بەكىتىپ، قازاقستان قالالارىنىڭ اۋاسىن جاقسارتۋعا بايلانىستى عىلىمي جۇمىسپەن اينالىسامىز. ادامداردىڭ كوشەدە بەتپەردەسىز جانە كولىك تەرەزەسىن اشىپ وتىرا الاتىنداي جاعدايىن جاساۋعا ارەكەتتەنەمىز”، - دەگەن ەدى جوبا اۆتورى.
