ۇلتتىق قاۋىپسىزدىك كوميتەتىنىڭ بۇرىنعى ءتوراعاسى كارىم ءماسىموۆتىڭ ەكس-ورىنباسرى داۋلەت ەرعوجين جاڭا قىلمىستىق ءىس بويىنشا كۇدىككە ءىلىندى دەگەن اقپارات تارادى، - دەپ حابارلايدى Dalanews.kz.
Ulysmedia.kz دەرەكتەرىنشە، كارىم ءماسىموۆتىڭ بۇرىنعى ورىنباسارى قازاقستاندىقتاردىڭ قۇپيا دەرەكتەرىنىڭ قىتايلىق GitHub سەرۆيستەرىنە ءوتىپ كەتۋىنە بايلانىستى كۇدىككە ءىلىنىپ وتىر.
"سول كەزدە ەرعوجين ۇلتتىق قاۋىپسىزدىك ماسەلەلەرىمەن، سونىڭ ىشىندە كيبەركەڭىستىك قاۋىپسىزدىگىمەن اينالىسقان. ول ارنايى جابدىقتاردى ەنگىزۋدى قاداعالاۋعا جاۋاپتى بولعان"، - دەپ جازىلعان باسىلىم مالىمەتىندە.
باسىلىم دەرەكتەرىنە سۇيەنسەك، جۋىردا قىتايدىڭ قوعامدىق قاۋىپسىزدىك مينيسترلىگىمەن ىنتىماقتاساتىن iSoon قۇپيا قۇجاتتامانىڭ جاريالانۋىنا جول بەرگەنى بەلگىلى بولدى. فايلدار GitHub قىزمەتىندە اشىق قول جەتىمدى.
"قحر الىنعان دەرەكتەردى تالداي جانە سۇرىپتاي وتىرىپ، ينتەرنەتتەگى جاريالانىمداردى باقىلاۋ جۇيەسى جاسالعان. جۇڭگو بيلىگى ءۇشىن قىزىعۋشىلىق تۋدىراتىن تاقىرىپتاردى تالقىلاۋعا مۇمكىندىك بەرەتىن ح الەۋمەتتىك جەلىسىندەگى پوستتاردى باقىلاۋ پلاتفورماسى قۇرىلىپتى.
ارام پيعىلدى پىسىقايلار كەز كەلگەن اقپاراتتى الۋ ارقىلى Android جانە iOS قۇرىلعىلارىنا شابۋىل جاساي الادى دەپ بولجانىپ وتىر. قۇجاتتاردا Beeline، Kcell جانە Tele2 سياقتى قازاقستاندىق بايلانىس وپەراتورلارىنىڭ دەرەكتەرى جاريالانعانى تۋرالى حابارلانادى. "قازاقتەلەكوم" جانە بجزق دا تىزىمدە بار"، - دەپ جازىلعان Ulysmedia.kz اقپاراتىندا.
ال كۇدىككە ءىلىنىپ وتىرعان داۋلەت ەرعوجين 2016 جىلعى قاراشادان باستاپ ۇقك ءتوراعاسىنىڭ ورىنباسارى قىزمەتىن اتقارعان بولاتىن. دەگەنمەن قاڭتار وقيعاسىنان كەيىن جۇمىستان بوساتىلدى.
2023 جىلى 24 ساۋىردە استانانىڭ قىلمىستىق ىستەر جونىندەگى مامانداندىرىلعان اۋدانارالىق سوتى ق ر ۇلتتىق قاۋىپسىزدىك كوميتەتىنىڭ ەكس-توراعاسى كارىم ماسىموۆكە، ۇلتتىق قاۋىپسىزدىك كوميتەتى ءتوراعاسىنىڭ ەكس-ورىنباسارلارى ءانۋار سادىقۇلوۆ، داۋلەت ەرعوجين، مارات وسيپوۆكە قاتىستى قىلمىستىق ءىس بويىنشا ۇكىم شىعارعان بولاتىن.
سوت ءىستى "اسا قۇپيا" دەگەن بەلگىمەن قارادى. كارىم ءماسىموۆ ق ر قىلمىستىق كودەكسىنىڭ 175-بابىنىڭ 1-بولىگى، 179-بابىنىڭ 3-بولىگى، 362-بابىنىڭ 4-بولىگىنىڭ 3-تارماعى بويىنشا كىنالى دەپ تانىلىپ، 18 جىل باس بوستاندىعىنان ايرىلدى. سونىمەن قاتار، مەملەكەتتىك قىزمەتتە ءومىر بويى قىزمەت ەتە المايتىنى جانە مۇلكى تاركىلەنەتىنى ايتىلدى. كارىم ءماسىموۆ بۇعان قوسا گەنەرال شەنى مەن مەملەكەتتىك ناگرادالارىنان ايرىلدى.
ال ونىڭ ورىنباسارى داۋلەت ەرعوجين قىلمىستىق كودەكستىڭ 179-بابىنىڭ 3-بولىگى، 362-بابىنىڭ 4-بولىگى 3-تارماعى بويىنشا كىنالى دەپ تانىلىپ، 15 جىلعا باس بوستاندىعىنان ايىرىلدى.
كەيىن اپەللياسيالىق ساتى ك.ماسىموۆكە، ا. سادىقۇلوۆقا جانە د. ەرعوجينگە قاتىستى ءبىرىنشى ساتىداعى سوت ۇكىمىن قاۋىپسىزدىگى ەڭ جوعارى مەكەمەدەن قاۋىپسىزدىگى ورتاشا مەكەمەدە جازاسىن وتەۋ بويىنشا وزگەرتتى.
