قۇلسارىدا مەكتەپتە بالتا ۇستاپ جۇرگەن ءجاسوسپىرىم ەكى وقۋشىنى جاراقاتتاعان، دەپ حابارلايدى Dalanews.kz.

5 اقپاندا 102 ارناسىنا قۇلسارى قالاسىندا 10-سىنىپ وقۋشىسى قاتارلاستارىمەن جانجالدان كەيىن ولارعا شابۋىل جاساپ، مەكتەپ اۋماعىنان بوي تاسالاعانى تۋرالى حابارلاما تۇسكەن.

وقيعا سالدارىنان ەكى وقۋشى جەڭىل دەنە جاراقاتىن العان.

"حابارلاما تۇسكەن بويدا وقيعا ورنىنا پوليسيا قىزمەتكەرلەرى جەدەل جەتىپ، ءجاسوسپىرىم ۇستالدى. وقيعاعا قاتىسۋشىلار مەن ولاردىڭ اتا-انالارى پوليسيا بولىمىنە جەتكىزىلدى"، - دەدى پوليسيا.

بۇل دەرەككە قاتىستى بۇزاقىلىق بويىنشا قىلمىستىق ءىس قوزعالدى. 15 جاستاعى كۇدىكتى ۋاقىتشا ۇستاۋ يزولياتورىنا قامالىپ، ىشكى ىستەر ورگاندارىنىڭ ەسەبىنە الىندى.

"جيناقتالعان ماتەريالدار شەشىم قابىلداۋ ءۇشىن كامەلەتكە تولماعانداردىڭ ىستەرى جونىندەگى كوميسسياعا جولداندى. سونداي-اق، ءجاسوسپىرىمنىڭ اتا-اناسىنا قاتىستى كامەلەتكە تولماعان بالانى تاربيەلەۋ جونىندەگى مىندەتتەرىن تيىسىنشە ورىنداماعانى ءۇشىن اكىمشىلىك ءىس قوزعالدى"، - دەدى پوليسيا.

قىلمىستىق ءىس اياسىندا قىلمىسقا ىقپال ەتكەن سەبەپتەر مەن جاعدايلاردى جويۋ تۋرالى ءبىلىم بەرۋ بولىمىنە ۇسىنىس ەنگىزىلدى. تەرگەۋ قورىتىندىسى بويىنشا ءبىلىم بەرۋ ۇيىمىنىڭ لاۋازىمدى تۇلعالارىنىڭ، سونداي-اق، وقۋ ورنىن كۇزەتۋدى جۇزەگە اسىرعان كۇزەت اگەنتتىگى قىزمەتكەرلەرىنىڭ ارەكەتتەرىنە قۇقىقتىق باعا بەرىلمەك.