قوستاناي وبلىسى باسەكەلەستىكتى قورعاۋ جانە دامىتۋ دەپارتامەنتى احمەت بايتۇرسىن ۇلى اتىنداعى "قوستاناي حالىقارالىق اۋەجايى" اق-عا قاتىستى تەكسەرۋدى اياقتادى. تەكسەرۋ اۋەجايدىڭ اۋەجانارماي باعاسىن كوتەرۋىنە بايلانىستى جۇرگىزىلگەن، دەپ حابارلايدى Dalanews.kz.
بۇل اقپاراتتى "قازاقپارات" راستادى. دەپارتامەنت باسشىسى داستان سامەننىڭ مالىمدەۋىنشە، تەكسەرىس ناتيجەسىندە كومپانياعا 8،4 ملن تەڭگە ايىپپۇل سالىنىپ، نارىقتىق كوتەرمە باعا ارقىلى الىنعان كىرىسىنەن 8،1 ملن تەڭگە تاركىلەنگەن.
سونىمەن قاتار اۋەجايعا انتيكونكۋرستىق زاڭنامانى بۇزۋدى جويۋ تۋرالى نۇسقاۋ بەرىلدى. ونىڭ ورىندالۋ مەرزىمى دە ءالى بەلگىلەنگەن جوق.
دەپارتامەنت مالىمەتىنشە، اۋەجانارماي قۇنىنىڭ ءوسۋى جولاۋشىلاردىڭ بيلەت تاريفىنە اسەر ەتپەگەن جانە اۋەكومپانيا بيلەتتەرىنىڭ باعاسى وزگەرمەگەن.
ەستەرىڭىزگە سالا كەتەيىك، بۇعان دەيىن استاناداعى "نۇرسۇلتان نازاربايەۆ حالىقارالىق اۋەجايى" اۋەجانارماي ساتۋ قۇقىعى ءۇشىن الىناتىن تولەمدى كۇرت كوتەرگەنى ءۇشىن تەكسەرىلىپ جاتقان ەدى. بۇل تولەمدەردىڭ كوبەيۋى تىكەلەي اۋە كەمەلەرىن جانارمايمەن قامتاماسىز ەتۋ قۇنىنا اسەر ەتەدى.
باسەكەلەستىكتى قورعاۋ جانە دامىتۋ اگەنتتىگىنىڭ جوبالىق قورىتىندىسىنا سايكەس، وتكەن جىلدىڭ تامىزىنان باستاپ اۋەجاي ءبىر توننا ءۇشىن الىناتىن تولەمدى 16 240 تەڭگەدەن 77 852 تەڭگەگە دەيىن كوتەرگەن (ققس ەسەپكە الىنبايدى). بيىلعى جىلدىڭ اقپانىنان باستاپ بۇل تولەم 60 137 تەڭگە بولىپ بەلگىلەنگەن.
