قارجى مينيسترلىگىنىڭ مەملەكەتتىك كىرىستەر كوميتەتى قولما-قول اقشاسىز تولەمدەردى قابىلداۋدان باس تارتۋدىڭ زاڭسىز ەكەنىن ەسكەرتتى. مىسالى، ەلىمىزدە بىلتىرعى 11 ايدىڭ قورىتىندىسى بويىنشا قولما-قول اقشاسىز تولەمدەردىڭ ۇلەسى 86%-عا دەيىن وسكەن (2022 جىلى – 82%).
ءقازىر 6 جاستان اسقان بالالار دا قولما-قول اقشاسىز تولەمدەردى بەلسەندى پايدالاناتىنىن ەسكەرگەن ءجون. اتا-انالاردىڭ 41،4%-ى بالالارىنا كارتا راسىمدەگەن.
تولەمدەر جانە تولەم جۇيەلەرى تۋرالى» زاڭنىڭ نورمالارىندا ءارتۇرلى تولەم ادىستەرى – بانك كارتاسى، QR تولەمى نەمەسە قولما-قول اقشا قاراستىرىلعان (25-باپ). كاسىپكەرلەرگە تولەم كارتوچكالارى ارقىلى تولەمدەردى قابىلداۋدان باس تارتقانى ءۇشىن ءبىرىنشى رەت ەسكەرتۋ تۇرىندە اكىمشىلىك جاۋاپكەرشىلىككە تارتۋ، ال قايتالاپ زاڭ بۇزعانى ءۇشىن 147 680 تەڭگە (40 اەك) مولشەرىندە ايىپپۇل سالۋ كوزدەلگەن (ق ر اكىمشىلىك قۇقىقبۇزۋشىلىق تۋرالى كودەكسىنىڭ 194-بابى). قولما-قول اقشاسىز تولەمدەردى قابىلداۋدان باس تارتۋ فاكتىلەرى تۋرالى مەملەكەتتىك كىرىستەر ورگاندارىنا حابارلاسۋىڭىز قاجەت، – دەلىنگەن اقپاراتتا.
سونىمەن بىرگە اتالعان كوميتەت سالىق كودەكسى ميكرو جانە شاعىن بيزنەس سۋبەكتىلەرىنە وڭايلاتىلعان سالىق سالۋ جاعدايى جاسالعانىن باسا ايتادى. اتاپ ايتقاندا، سالىق مولشەرلەمەلەرى – قىزمەت تۇرىنە بايلانىستى 1%-دان 4%-عا دەيىن.
كاسىپكەر وزىنە ىڭعايلى سالىق رەجيمىن تاڭداي الادى:
پاتەنت (سالىق مولشەرلەمەسى – 1%)؛
وڭايلاتىلعان دەكلاراسيا (سالىق مولشەرلەمەسى – 3%)؛
بولشەك سالىق رەجيمى (سالىق مولشەرلەمەسى – 4%).
سونداي-اق كوميتەت تاۋارلاردى ساتۋ نەمەسە قىزمەت كورسەتۋ كەزىندە كاسىپكەرلەر دە ساتىپ الۋشىعا تۇبىرتەك بەرۋگە مىندەتتى ەكەنىن ەسكە سالادى.
ايتا كەتسەك، بۇعان دەيىن ەلىمىزدە كاسىپكەرلەردىڭ جاپپاي ءموبيلدى اۋدارىممەن تولەم قابىلداۋدان باس تارتىپ جاتقانى تۋرالى جازىلعان بولاتىن.
