“بۇل جازبالار ءدىني باسقارمانىڭ بەدەلىنە نۇقسان كەلتىرۋ ماقساتىندا جازىلعانى بەسەنەدەن بەلگىلى. نەگىزسىز ايىپتاۋدىڭ سوڭى ايعاي-شۋعا ۇلاسىپ، ءيسى مۇسىلمان قاۋىمىنىڭ اراسىندا ارازدىق تۋعىزدى.
باسقارماعا جالا جاپقاندار ويلاعان ماقساتىنا جەتكەندەي. ولار ەل ىشىندە يسلام ءدىنى، مەشىت تۋرالى جاڭساق پىكىر قالىپتاستىرۋدى كوزدەگەن ەدى.
يسلام ءدىنىنىڭ ءتۇپ وزەگىن، ونىڭ كانوندارى مەن قاعيدالارىن بىلە بەرمەيتىن، مەشىت جۇمىسىنىڭ تىنىس-تىرشىلىگىنەن حابارسىز كەيبىر اعايىن قاسيەتتى دىنىمىزگە كوپە-كورنەۋ ءتىل تيگىزىپ، ول تۋرالى جالعان، جاڭساق سويلەپ، سول ارقىلى وزگەلەردىڭ دە كوكەيىنە كۇمان ۇيالاتىپ جاتقانى جايى بار.
ولار وسى ارەكەتى ارقىلى ەلىمىزدەگى ميلليونداعان ادامنىڭ نانىم-سەنىمىن قورلاپ، اسىل دىنىمىزگە ناقاقتان ناقا كۇيە جاعىپ وتىرعانىن تۇسىنسە دەپ ويلايسىڭ”، – دەيدى باقداۋلەت نۇرمات ۇلى.
يمام وسى رەتتە 2006 جىلى الەمدىك جانە ءداستۇرلى ءدىن سەزىندە ءدىن تاقىرىبىندا جازاتىن اقپارات قۇرالدارىنا ءتىل قاتقان ەلباسىنىڭ مىنا ءسوزىن مىسالعا كەلتىرگەن.
«جۋرناليستەر وزگە ءدىن وكىلدەرىنىڭ سەزىمدەرىمەن ساناسپاي، نامىسىنا تيسە، وندا بۇل ولاردىڭ ەرتە مە، كەش پە ءوز نانىم-سەنىمدەرىنىڭ قورلانۋىنا الىپ كەلەدى. بىرەۋ ءۇشىن قاسيەتتى نارسە باسقا بىرەۋ ءۇشىن ءازىل نەمەسە كەلەمەجدىڭ نىسانى بولماۋى قاجەت. بۇل قاراپايىم ەرەجەنى، وكىنىشكە قاراي، اقپارات قۇرالدارى مەن ساياساتشىلار ءجيى-جيى بۇزادى»، – دەگەن ەدى سول جولى نازاربايەۆ.
يمامنىڭ پايىمداۋىنشا، اقپاراتتىق عاسىردا وقىعان دۇنيەنى قورىتپاي قابىلداۋ ءقاۋىپتى. اقپاراتتى الدىمەن وي سۇزگىسىنەن وتكىزگەن ءجون. دايەكسىز، دالەلسىز اقپاراتتى الەمجەلىدە ءبولىسىپ نەمەسە جاقىن ادامىڭا جولداۋ اداسۋعا اپاراتىن بىردەن-بىر جول.
“جالا جابىلعان ادام تۋرالى جامان ويلاۋدان اۋلاق بولۋ قاجەت. بۇل يسلام ءدىنىنىڭ نەگىزگى ۇستىندارىنىڭ ءبىرى. بىرەۋدىڭ سىرتىنان تون ءپىشۋ، ونىڭ جاعىمسىز وبرازىن جاساپ، جۇرتقا جامانداۋ اۋىر كۇنا.
قاسيەتتى قۇراندا ايشا اناعا جابىلعان جالادان كەيىن تۇسكەن اياتتا: "ەگەردە ونى ەستىگەن كەزدە: «بۇنى ءبىزدىڭ ايتۋىمىزعا بولمايدى. اللا ساقتاسىن. بۇل ءبىر ءىرى جالا" دەگەن بولساڭدار ەدى" («نۇر» سۇرەسى، 12-ايات)، – دەلىنگەن.
قمدب-عا قارعىس جاۋدىرعاندار يمامداردىڭ تانىمىنا، ءبىلىم دەڭگەيىنە كۇمان كەلتىرىپتى.
ەلىمىزدەگى ءدىن قىزمەتكەرلەرىنىڭ دەرلىگى تۇركيا مەن ەگيپەتتە ءبىلىم العان كوزى اشىق، كوكىرەگى وياۋ ماماندار. البەتتە ءدىني باسقارماعا ءبىلىمى كەمەل، تانىمى تەرەڭ ءدىن قىزمەتكەرلەرى ءارۋاقىتتا قاجەت.
بۇل ماسەلەدە ءدىني باسقارما ۇزاقمەرزىمدى ستراتەگيالىق جوسپار ازىرلەگەن جانە وسى جوسپاردىڭ نەگىزىندە ءبىراز شارۋا تىندىرىلىپ، كۇرمەۋلى، تۇيتكىلدى دۇنيەلەر كەزەڭ-كەزەڭىمەن شەشىمىن تابۋدا. اشۋعا بوي الدىرماي، بۇلىكشىلەردىڭ ايتاعىنا ەرمەي، قولىمىزدان كەلگەنشە ساۋاپتى ىسكە سەبەپشى بولايىق”، – دەيدى باقداۋلەت قاجى نۇرمات ۇلى.
