ۋكراينا پرەزيدەنتى ۆلاديمير زەلەنسكيي رەسەي مەن ۋكراينا اراسىنداعى سوعىستىڭ ۋشىعۋىنا بايلانىستى باسپا ءسوز كونفەرەنسياسىن وتكىزدى. ول سوعىستى توقتاتۋ مەن بەيبىتشىلىك ورناتۋ مۇمكىندىكتەرى، اقش-پەن كەلىسسوزدەر، دونالد ترامپپەن قارىم-قاتىناسى جانە ۋكرايناداعى سايلاۋ ماسەلەلەرى جونىندە پىكىر ءبىلدىردى، دەپ حابارلايدى Dalanews.kz. 

پرەزيدەنتتىك وكىلەتتىكتەن باس تارتۋعا دايىنمىن

زەلەنسكيي بەيبىتشىلىك ورناتۋ ءۇشىن ءوز لاۋازىمىنان كەتۋگە دايىن ەكەنىن مالىمدەدى.

“ەگەر بۇل ارەكەتىم راسىمەن ۋكرايناعا بەيبىتشىلىك اكەلەتىن بولسا، قىزمەتىمنەن كەتۋگە دايىنمىن”، – دەدى ول.

اقش-پەن كەلىسسوزدەر

زەلەنسكيي اقش-تىڭ ۋكرايناداعى مينەرالدى رەسۋرستارعا قول جەتكىزۋ تۋرالى كەلىسىمى ءالى تالقىلاۋ كەزەڭىندە تۇرعانىن اتاپ ءوتتى. بۇعان دەيىن بىرنەشە ۇسىنىس بولعانىمەن، كييەۆ ولاردى قابىلداماعان.

سونىمەن قاتار اقش پرەزيدەنتى دونالد ترامپتىڭ “ۋكراينانىڭ 500 ميلليارد دوللار قارىزى بار” دەگەن مالىمدەمەسىمەن كەلىسپەيتىنىن جەتكىزدى.

“ۋكراينا سوعىسقا 120 ميلليارد دوللار جۇمسادى. اقش 100 ميلليارد ءبولدى، ال ەۋروپا مەن باسقا سەرىكتەستەر تاعى 100 ميلليارد قارجىلاي كومەك كورسەتتى. ءبىز اقش-تىڭ كومەگىن قارىز رەتىندە قابىلدامايمىز، سەبەبى بۇل قاراجات بىزگە گرانت تۇرىندە بەرىلدى”، – دەدى زەلەنسكيي.

ونىڭ ايتۋىنشا، ۋكراينا بولاشاق ۇرپاقتىڭ موينىنا اۋىر قارىز جۇكتەيتىن كەلىسىمگە قول قويمايدى. ءبىراق ەگەر اقش جاڭا تالاپتار قويسا، ولاردى تالقىلاۋعا دايىن ەكەنىن ءبىلدىردى.

“ەگەر اقش بىزگە كومەك بەرىپ، ونىڭ قايتارىمىن كۇتسە، وندا بۇل گرانت ەمەس، قارىز بولىپ سانالادى. ءبىراق مەن وسىنداي اشىق كەلىسسوزدەرگە دايىنمىن، ويتكەنى بىزگە اقش-تىڭ كومەگى قاجەت”، – دەدى ول.

سوعىستى وسى اپتادا توقتاتۋ مۇمكىن ەمەس

زەلەنسكيي اقش-تىڭ “سوعىستى وسى اپتادا توقتاتۋعا بولادى” دەگەن مالىمدەمەسىنە قاتىستى دا پىكىر ءبىلدىردى.

“بۇل اپتادا سوعىستى توقتاتۋ مۇمكىن ەمەس، سەبەبى بىزگە ناقتى قاۋىپسىزدىك كەپىلدىكتەرى قاجەت. اقش ءۇشىن اتىستى توقتاتۋ – سوعىستى اياقتاۋ دەگەندى ءبىلدىرۋى مۇمكىن، ءبىراق ۋكراينا ءۇشىن بۇل جەتكىلىكسىز”، – دەپ ءتۇسىندىردى پرەزيدەنت.

ونىڭ پىكىرىنشە، رەسەيمەن كەلىسسوزدەر جۇرگىزۋ بارىسىندا ناقتى قاۋىپسىزدىك كەپىلدىكتەرى بولۋى كەرەك.

“بىزگە رەسەيدىڭ كەپىلدىكتەرى قاجەت ەمەس – ءبىز ولارعا سەنبەيمىز. ەگەر سەرىكتەستەر سەنسە، بۇل – ولاردىڭ تاڭداۋى. ءبىراق ءبىز قاۋىپسىزدىك كەپىلدىكتەرى تۋرالى شەشىم قابىلداعاندا، رەسەيدىڭ سوزىنە سەنىم ارتا المايمىز. بارلىعى سوعىستى توقتاتقىسى كەلەدى. ءبىز دە سوعىستىڭ اياقتالعانىن قالايمىز. ءبىراق ءبىز ءۇشىن ەڭ باستىسى – ۋكراينالىقتاردىڭ قاۋىپسىزدىگىنە ناقتى كەپىلدىكتەر الۋ”، – دەپ تۇيىندەدى زەلەنسكيي.