Ýkraina prezidenti Vladimir Zelenskii Resei men Ýkraina arasyndaǵy soǵystyń ýshyǵýyna bailanysty baspasóz konferentsiiasyn ótkizdi. Ol soǵysty toqtatý men beibitshilik ornatý múmkindikteri, AQSh-pen kelissózder, Donald Tramppen qarym-qatynasy jáne Ýkrainadaǵy sailaý máseleleri jóninde pikir bildirdi, dep habarlaidy Dalanews.kz.
Prezidenttik ókilettikten bas tartýǵa daiynmyn
Zelenskii beibitshilik ornatý úshin óz laýazymynan ketýge daiyn ekenin málimdedi.
“Eger bul áreketim rasymen Ýkrainaǵa beibitshilik ákeletin bolsa, qyzmetimnen ketýge daiynmyn”, – dedi ol.
AQSh-pen kelissózder
Zelenskii AQSh-tyń Ýkrainadaǵy mineraldy resýrstarǵa qol jetkizý týraly kelisimi áli talqylaý kezeńinde turǵanyn atap ótti. Buǵan deiin birneshe usynys bolǵanymen, Kiev olardy qabyldamaǵan.
Sonymen qatar AQSh prezidenti Donald Tramptyń “Ýkrainanyń 500 milliard dollar qaryzy bar” degen málimdemesimen kelispeitinin jetkizdi.
“Ýkraina soǵysqa 120 milliard dollar jumsady. AQSh 100 milliard bóldi, al Eýropa men basqa seriktester taǵy 100 milliard qarjylai kómek kórsetti. Biz AQSh-tyń kómegin qaryz retinde qabyldamaimyz, sebebi bul qarajat bizge grant túrinde berildi”, – dedi Zelenskii.
Onyń aitýynsha, Ýkraina bolashaq urpaqtyń moinyna aýyr qaryz júkteitin kelisimge qol qoimaidy. Biraq eger AQSh jańa talaptar qoisa, olardy talqylaýǵa daiyn ekenin bildirdi.
“Eger AQSh bizge kómek berip, onyń qaitarymyn kútse, onda bul grant emes, qaryz bolyp sanalady. Biraq men osyndai ashyq kelissózderge daiynmyn, óitkeni bizge AQSh-tyń kómegi qajet”, – dedi ol.
Soǵysty osy aptada toqtatý múmkin emes
Zelenskii AQSh-tyń “soǵysty osy aptada toqtatýǵa bolady” degen málimdemesine qatysty da pikir bildirdi.
“Bul aptada soǵysty toqtatý múmkin emes, sebebi bizge naqty qaýipsizdik kepildikteri qajet. AQSh úshin atysty toqtatý – soǵysty aiaqtaý degendi bildirýi múmkin, biraq Ýkraina úshin bul jetkiliksiz”, – dep túsindirdi prezident.
Onyń pikirinshe, Reseimen kelissózder júrgizý barysynda naqty qaýipsizdik kepildikteri bolýy kerek.
“Bizge Reseidiń kepildikteri qajet emes – biz olarǵa senbeimiz. Eger seriktester sense, bul – olardyń tańdaýy. Biraq biz qaýipsizdik kepildikteri týraly sheshim qabyldaǵanda, Reseidiń sózine senim arta almaimyz. Barlyǵy soǵysty toqtatqysy keledi. Biz de soǵystyń aiaqtalǵanyn qalaimyz. Biraq biz úshin eń bastysy – ýkrainalyqtardyń qaýipsizdigine naqty kepildikter alý”, – dep túiindedi Zelenskii.
