تۇركىستاندا ەكى بالاسىن ولتىرگەن ايەلگە بايلانىستى تىڭ دەرەكتەر پايدا بولدى. ول ءبىلىم بەرۋ ۇيىمىندا 10 جىلدان بەرى جۇمىس ىستەپ كەلگەن. بۇل اقپاراتتى قىزىلوردا وبلىستىق ءبىلىم باسقارماسىنىڭ باسشىسى اسقاربەك ەسجانوۆ راستادى، دەپ حابارلايدى Dalanews.kz.

ەسجانوۆتىڭ ايتۋىنشا، بالالارىن ءولتىردى دەگەن كۇدىكتى ەشقانداي ديسپانسەرلىك ەسەپتە تۇرماعان. ارىپتەستەرىمەن، اتا-انالارمەن جانە وقۋشىلارمەن قارىم-قاتىناسى جاقسى بولعان.

“تۇركىستاندا بولعان بالالار ولىمىنە قاتىستى كۇدىكتى شيەلى اۋدانىنداعى ءبىلىم بەرۋ ۇيىمىندا 2014 جىلدان بەرى ءمۇعالىم قىزمەتىن اتقارىپ كەلگەن. وقيعا بولعان 7 اقپان كۇنى مەكتەپ اكىمشىلىگىنە ەسكەرتپەستەن جۇمىسقا بارماعان. مەكتەپ اكىمشىلىگى كۇدىكتىنىڭ ۇجىم، اتا-انالار جانە وقۋشىلارمەن ءتىل تابىسۋى، جايلى مىنەزىمەن ەرەكشەلەنگەنىن ايتادى” - دەيدى باسقارما بسسشىسى.

سونىمەن قاتار ول پەداگوگيكالىق قىزمەتىندە بالالاردى وقىتۋ مەن تاربيەلەۋدە ءبىرقاتار جەتىستىككە جەتكەنىن دە العا تارتتى.

“ءتيىستى العىس حاتتارمەن ماراپاتتالعان. ارىپتەستەرىنىڭ ايتۋىنشا، مىنەزىندە ەشقانداي اۋىتقۋ بولماعان. ءوزى تولىققاندى وتباسى، اتا-ەنەسى، جۇبايىمەن بىرگە تۇرعان. ءقازىر ىشكى ىستەر ورگاندارىندا بۇل بويىنشا قىلمىستىق ءىس تىركەلگەن. قورىتىندىسى تەرگەۋ امالدارىنان كەيىن بەلگىلى بولادى، - دەدى باسقارما باسشىسى. 

ەسكە سالايىق، 7 اقپاندا تۇركىستاندا ايەل جالدامالى پاتەردە ەكى بالاسىن جاستىقپەن تۇنشىقتىرىپ ولتىرگەن بولاتىن.