قازاقستان حالقىنىڭ بىرلىگى كۇنىندە وبلىس اكىمى نۇرلىبەك نالىبايەۆتىڭ قاتىسۋىمەن قىزىلوردا قالاسىندا «قازاتومونەركاسىپ» ۇلتتىق اتوم كومپانياسى» اكسيونەرلىك قوعامىنىڭ قولداۋىمەن بوي كوتەرەتىن «دوستىق ءۇيىنىڭ» جاڭا عيماراتىنىڭ ىرگەتاسىن قالاۋ ءراسىمى ءوتتى،- دەپ حابارلايدى Dalanews.kz
سالتاناتتى شاراعا پارلامەنت سەناتى مەن ءماجىلىسىنىڭ دەپۋتاتتارى رۋسلان رۇستەموۆ، مۇرات ەرگەشبايەۆ، مەملەكەت جانە قوعام قايراتكەرى مۇرات باقتيار ۇلى، «قازاتومونەركاسىپ» ۇلتتىق اتوم كومپانياسى» اكسيونەرلىك قوعامىنىڭ باسقارما ءتوراعاسى مەيىرجان يۋسۋپوۆ، زيالى قاۋىم وكىلدەرى مەن سالا باسشىلارى قاتىستى.
وبلىس اكىمى جينالعان جۇرتشىلىقتى قازاقستان حالقىنىڭ بىرلىگى كۇنىمەن، قازاقستان حالقى اسسامبلەياسىنىڭ 30 جىلدىعىمەن قۇتتىقتاپ، وڭىردەگى جوبالار مەن جاڭا ورتالىقتا اتقارىلاتىن جۇمىستارعا توقتالدى.
«بەرەكە-بىرلىگىمىزدىڭ ۇيىتقىسىنا اينالىپ، ەلىمىزدەگى ەتنوسارالىق دوستىق پەن بىرلىكتىڭ ۇلگىسىن الەمگە تانىتقان قازاقستان حالقى اسسامبلەياسىنىڭ قۇرىلعانىنا بيىل 30 جىل تولدى. اتالعان قۇرىلىم بۇگىندە حالقىمىزدى بىرلىككە، دوستىققا ۇندەيتىن جالپىۇلتتىق كەلىسىمنىڭ نەگىزىنە اينالدى.
مەملەكەت باسشىمىز قاسىم-جومارت كەمەل ۇلى قازاقستان حالقى اسسامبلەياسىنىڭ حححIV سەسسياسىندا: «بىلتىر ەلىمىزدىڭ رۋحاني جانە تاريحي-مادەني ورداسى – تۇركىستاندا جاڭا "دوستىق ءۇيى" اشىلدى. "دوستىق ۇيلەرى" تاعى بىرنەشە قالا مەن اۋدان ورتالىعىندا اشىلادى دەپ جوسپارلانۋدا. مەن بۇل باستامانى قولدايمىن. ءبىز قوعامدىق كەلىسىم ينفراقۇرىلىمىن بىرتىندەپ كەڭەيتە بەرۋىمىز كەرەك»، - دەگەن بولاتىن.جاڭا «دوستىق ءۇيى» – ايماعىمىزدىڭ بىرلىگى مەن ىنتىماعىن نىعايتۋعا اتسالىسقان ەتنومادەني بىرلەستىكتەر مەن اسسامبلەيا بەلسەندىلەرى ءۇشىن بارلىق قاجەتتىلىكتەرمەن قامتاماسىز ەتىلگەن زامانۋي عيمارات بولادى»، - دەدى ن.نالىبايەۆ.
جاڭا نىساننىڭ ىرگەتاسىن قالاۋ راسىمىندە مەيىرجان يۋسۋپوۆ “دوستىق ءۇيى” ەل يگىلىگىنە، جاقسىلىققا قىزمەت ەتسىن دەگەن تىلەگىن ءبىلدىردى.
سونداي-اق، رۋسلان رۇستەموۆ، مۇرات ەرگەشبايەۆ، مۇرات باقتيار ۇلى ءسوز سويلەپ، راسىمگە قاتىسۋشىلاردى مەرەكەمەن قۇتتىقتادى.
«دوستىق ءۇيىنىڭ» جاڭا عيماراتى «قازاتومونەركاسىپ» ۇلتتىق اتوم كومپانياسى» اكسيونەرلىك قوعامىنىڭ قولداۋىمەن 3 ملرد. 800 ملن. تەڭگەگە سالىنادى.
