1 ماۋسىم — بالالاردى قورعاۋ كۇنىندە قىزىلوردادا قايتا جاڭعىرتۋدان وتكەن قالالىق مادەني-دەمالىس پاركى اشىلدى. بۇل تۋرالى قالا اكىمدىگى مالىمدەدى، – دەپ حابارلايدى Dalanews.kz
اتتراكسيون پاركى 1953 جىلى اشىلعان. 1996 جىلى جەكەشەلەندىرىلىپ، 2008 جىلى مەملەكەت مەنشىگىنە قايتارىلدى.
بيىل مەردىگەر «Bi Global» كومپانياسى جوبالىق-سمەتالىق قۇجاتقا سايكەس ونى تولىق جوندەپ، پارك جاڭارعان كەيىپكە ەندى. بۇل جۇمىسقا 6،3 ملرد تەڭگە ءبولىندى.
— كىرەبەرىس قاقپا الدىنداعى «سىر باتىرلارى» ەسكەرتكىشى تاعزىم الاڭىنا كوشىرىلدى. ول جەرگە اركا ورناتىلىپ، جاڭا ۇلگىدەگى كەسپەتاس توسەلدى. قورشاۋ تولىق جاڭارتىلدى. بەتوندى سكەيتپارك، 20-عا جۋىق اتتراكسيون، كافە عيماراتىن ورنالاستىرۋعا ارنالعان الاڭ جانە ويىن الاڭدارى سالىندى. جاڭا سۋبۇرقاقتار پاركتىڭ بارلىق اۋماعىن قامتيدى. اشىق اسپان استىندا كۇندەلىكتى كەلۋشىلەرگە مادەني قىزمەت كورسەتۋگە، كونسەرتتىك باعدارلامالار قويۋعا ارناپ 100 ادامعا لايىقتالعان امفيتەاتر سالىندى، - دەلىنگەن اكىمدىك حابارلاماسىندا.
